વડોદરા શહેરના અંદાજે 3 લાખથી વધુ ગેસ ગ્રાહકો માટે મોંઘવારીના વધુ એક ઝટકા સમાન સમાચાર સામે આવ્યા છે.
Vadodara Gas Limited દ્વારા પાઇપલાઇન ગેસ (PNG) અને કોમ્પ્રેસ્ડ નેચરલ ગેસ (CNG)ના ભાવમાં વધારો કરવામાં આવ્યો છે. છેલ્લા પાંચ મહિનામાં કંપની દ્વારા કરવામાં આવેલો આ બીજો ભાવ વધારો હોવાનું સામે આવ્યું છે. માહિતી મુજબ, ઘરગથ્થુ વપરાશ માટેના PNGના ભાવમાં પ્રતિ ઘન મીટર ₹1.50નો વધારો કરવામાં આવ્યો છે. નવા વધારા બાદ હવે PNGનો દર ₹51.74 પ્રતિ ઘન મીટર થયો છે. બીજી તરફ વાહનચાલકો માટે CNGના ભાવમાં પ્રતિ કિલોગ્રામ ₹1નો વધારો કરવામાં આવ્યો છે, જેના કારણે હવે વડોદરામાં CNGનો નવો ભાવ ₹83.95 પ્રતિ કિલો થયો છે.સૂત્રોના જણાવ્યા અનુસાર, આ નવા દરો 1 મેથી અમલમાં આવી ગયા છે.
જોકે, કંપની દ્વારા આ અંગે કોઈ સત્તાવાર જાહેર જાહેરાત કરવામાં આવી નહોતી. ગ્રાહકોને ભાવ વધારાની જાણ ત્યારે થઈ જ્યારે અપડેટ કરેલા દરો કંપનીની વેબસાઇટ પર દર્શાવવામાં આવ્યા.આ ભાવ વધારો એવા સમયે કરવામાં આવ્યો છે જ્યારે આંતરરાષ્ટ્રીય સ્તરે ભૌગોલિક-રાજકીય તણાવ વધ્યો છે. અમેરિકા, ઈઝરાયલ અને ઈરાન વચ્ચે વધતા તણાવને કારણે વૈશ્વિક તેલ અને ગેસ બજારમાં અસ્થિરતા સર્જાઈ છે. નિષ્ણાતોનું માનવું છે કે કુદરતી ગેસના વધતા આયાત ખર્ચ અને પુરવઠાની અનિશ્ચિતતાને કારણે ગેસ વિતરણ કંપનીઓ પર આર્થિક દબાણ વધ્યું છે, જેનો સીધો બોજ હવે ગ્રાહકો પર પડી રહ્યો છે.PNGના ભાવ વધારાથી ઘરગથ્થુ બજેટ પર અસર પડશે, જ્યારે CNG મોંઘું થતાં વાહનચાલકો અને જાહેર પરિવહનના ખર્ચમાં પણ વધારો થવાની શક્યતા વ્યક્ત કરવામાં આવી રહી છે.
Reporter: admin
