સાંસદ પ્રવીણ ખંડેલવાલે કેન્દ્રીય આરોગ્ય મંત્રી અને IRDAIને લખ્યો પત્ર; “દર્દી ફાઈલ નહીં, સંવેદનશીલ માનવ જીવન છે”
દિલ્હી સહિત દેશભરના લાખો મેડિકલ ઇન્શ્યોરન્સ ધારક દર્દીઓ હોસ્પિટલો, વીમા કંપનીઓ અને TPA (થર્ડ પાર્ટી એડમિનિસ્ટ્રેટર)ની વહીવટી પ્રક્રિયાઓના કારણે ભારે હાલાકી ભોગવી રહ્યા હોવાનું મુદ્દો હવે રાષ્ટ્રીય સ્તરે ઉઠ્યો છે. CAIT ઈન્ડિયાના મહામંત્રી અને ચાંદની ચોકના સાંસદ Praveen Khandelwalએ કેન્દ્રીય આરોગ્ય અને પરિવાર કલ્યાણ મંત્રી Jagat Prakash Naddaને પત્ર લખીને હોસ્પિટલ ડિસ્ચાર્જ પ્રક્રિયામાં થતા બિનજરૂરી વિલંબ સામે તાત્કાલિક હસ્તક્ષેપની માંગ કરી છે.પ્રવીણ ખંડેલવાલે જણાવ્યું હતું કે દર્દીઓ મોંઘા પ્રીમિયમ ચૂકવીને સ્વાસ્થ્ય વીમો લે છે, છતાં સારવાર પૂર્ણ થયા બાદ અને ડોક્ટર દ્વારા રજા આપવામાં આવ્યા પછી પણ કલાકો સુધી હોસ્પિટલોમાં રોકાઈ રહેવું પડે છે. ટીપીએ, હોસ્પિટલો અને વીમા કંપનીઓ વચ્ચે મંજૂરી, દસ્તાવેજો અને ફાઈલ પ્રક્રિયાના નામે દર્દીઓને માનસિક અને આર્થિક પીડા સહન કરવી પડે છે.તેમણે IRDAIને પણ અલગથી પત્ર લખીને વીમા કંપનીઓ અને TPA માટે કડક સમયબદ્ધ માર્ગદર્શિકા અમલમાં મૂકવાની માંગ કરી છે.
તેમના જણાવ્યા મુજબ ઘણી વખત અગાઉથી મંજૂર થયેલી સારવાર પછી પણ અંતિમ ડિસ્ચાર્જ સમયે નવા દસ્તાવેજોની માંગણી કરવામાં આવે છે અને જવાબદારી એકબીજા પર ઢોળવામાં આવે છે, જેના કારણે દર્દી અને તેના પરિવારજનો સૌથી નબળો પક્ષ બની જાય છે.ખંડેલવાલે આ સમસ્યાને માત્ર વહીવટી નહીં પરંતુ ગંભીર માનવીય અને સામાજિક મુદ્દો ગણાવ્યો હતો. વધારાના કલાકો સુધી હોસ્પિટલમાં રોકાતા દર્દીઓને વધારાના બેડ ચાર્જ, દવાઓ અને અન્ય ખર્ચનો સામનો કરવો પડે છે. ખાસ કરીને વરિષ્ઠ નાગરિકો, મહિલાઓ અને ગંભીર બીમારીમાંથી બહાર આવી રહેલા દર્દીઓ માટે આ પ્રતીક્ષા વધુ પીડાદાયક બની રહી હોવાનું તેમણે જણાવ્યું.તેમણે કેન્દ્ર સરકાર સમક્ષ કેટલાક મહત્વપૂર્ણ સૂચનો પણ રજૂ કર્યા છે. જેમાં ડિસ્ચાર્જ દસ્તાવેજો જમા થયા બાદ 1થી 2 કલાકમાં અંતિમ મંજૂરી ફરજિયાત બનાવવી, નિર્ધારિત સમયમાં જવાબ ન મળે તો “ડીમ્ડ અપ્રૂવલ” ગણવું, બિનજરૂરી વિલંબ બદલ હોસ્પિટલ, TPA અને વીમા કંપનીઓની જવાબદારી નક્કી કરવી, એકીકૃત ડિજિટલ પ્લેટફોર્મ ઉભું કરવું તથા 24×7 ક્લેમ ક્લિયરન્સ અને ફરિયાદ નિવારણ વ્યવસ્થા શરૂ કરવાના મુદ્દાઓનો સમાવેશ થાય છે.CAIT ગુજરાતના પ્રમુખ Paresh Parikhએ જણાવ્યું હતું કે પ્રવીણ ખંડેલવાલ દ્વારા લખાયેલા આ પત્રની નકલ ગુજરાતના આરોગ્ય મંત્રીને પણ મોકલવામાં આવશે જેથી રાજ્ય સ્તરે પણ દર્દી હિતમાં કાર્યવાહી થઈ શકે.
Reporter: admin
