અમેરિકા અને ચીન વચ્ચે વધતા તણાવ વચ્ચે વૈશ્વિક રાજકારણમાં આ સપ્તાહ અત્યંત મહત્વપૂર્ણ બની ગયું છે.
એક તરફ અમેરિકાના રાષ્ટ્રપતિ Donald Trump ચીનની મુલાકાતે બેઇજિંગ પહોંચ્યા છે, તો બીજી તરફ અમેરિકામાં ચીનના કથિત જાસૂસી નેટવર્કનો પર્દાફાશ થતાં રાજકીય અને સુરક્ષા એજન્સીઓમાં ખળભળાટ મચી ગયો છે.કેલિફોર્નિયાના આર્કેડિયા શહેરની મેયર ઈલીન વાંગે ચીન માટે ગેરકાયદેસર એજન્ટ તરીકે કામ કરવાનો ગુનો કબૂલતા મામલો વધુ ગંભીર બન્યો છે. અમેરિકાના ન્યાય વિભાગ મુજબ, ઈલીન વાંગ અને તેમના પૂર્વ મંગેતર માઈક સન “યુએસ ન્યૂઝ સેન્ટર” નામની વેબસાઈટ મારફતે ચીન સમર્થક પ્રચાર ચલાવતા હતા. આ કેસમાં વાંગને 10 વર્ષ સુધીની જેલ સજા થઈ શકે છે. અમેરિકી અધિકારીઓએ આ ઘટનાને દેશની લોકશાહી અને રાષ્ટ્રીય સુરક્ષા માટે મોટો ખતરો ગણાવ્યો છે.આ દરમિયાન રાષ્ટ્રપતિ ટ્રમ્પ 13થી 15 મે દરમિયાન બેઇજિંગની મુલાકાતે છે, જ્યાં તેમની અને ચીનના રાષ્ટ્રપતિ Xi Jinping વચ્ચે હાઈ-પ્રોફાઇલ બેઠક યોજાવાની છે.
ટ્રમ્પ સાથે એપલ, ટેસ્લા, બોઇંગ અને અન્ય મોટી અમેરિકન કંપનીઓના ઉદ્યોગપતિઓનું પ્રતિનિધિમંડળ પણ જોડાયું છે.બેઠક દરમિયાન વેપાર અને ટેરિફ, આર્ટિફિશિયલ ઇન્ટેલિજન્સ, સાયબર સુરક્ષા, ઈરાન મુદ્દો અને તાઇવાનમાં ચીનની લશ્કરી ગતિવિધિઓ જેવા સંવેદનશીલ મુદ્દાઓ પર ચર્ચા થવાની સંભાવના છે. અમેરિકી ઉદ્યોગ જગત સપ્લાય ચેઇન અને ટેરિફ મુદ્દે સ્થિરતા ઈચ્છે છે, જ્યારે અમેરિકા ચીન-ઈરાન સંબંધોને લઈને પણ દબાણ લાવી શકે છે. નિષ્ણાતોનું માનવું છે કે આ મુલાકાતથી કોઈ મોટો રાજકીય ચમત્કાર થવાની શક્યતા ઓછી છે, પરંતુ બંને દેશો વચ્ચે વધતા સંઘર્ષને નિયંત્રણમાં રાખવા માટે રિસ્ક મેનેજમેન્ટ પર ભાર મૂકવામાં આવશે. વર્ષ 2017ની સરખામણીમાં આ વખતે ચીન ટેકનોલોજી અને ગ્રીન એનર્જી ક્ષેત્રે વધુ મજબૂત સ્થિતિમાં હોવાનું માનવામાં આવે છે.જાસૂસીના ખુલાસા અને આર્થિક સ્પર્ધા વચ્ચે યોજાઈ રહેલી આ ટ્રમ્પ-શી બેઠકને વૈશ્વિક તણાવ ઘટાડવાના પ્રયાસ તરીકે જોવામાં આવી રહી છે
Reporter: admin
