પટના: બિહારના પશ્ચિમ ચંપારણના બેતિયા જિલ્લામાં જિલ્લા શિક્ષણ અધિકારી રજનીકાંત પ્રવીણના ઘરે વિજિલન્સ ટીમે ગુરુવારે દરોડો પાડયો હતો, જેમાં ટીમને જંગી પ્રમાણમાં રોકડ મળતા ટીમ ચોંકી ઊઠી હતી. 

રજનિકાંત પ્રવીણ પર તેની આવક કરતાં વધુ સંપત્તિના આરોપો મૂકાયા હતા. રજનીકાંતના બેતિયા, દરભંગા, મધુબની, મુઝફ્ફરપુર અને પટના ખાતેના નિવાસ પર દરોડા પડયા હતા, જેમાં તેના બેતિયા ખાતેના ઘરમાંથી અંદાજે બે કરોડ રૂપિયાથી વધુની રોકડ જપ્ત કરાઈ હોવાનું માનવામાં આવે છે.બેતિયા, દરભંગા અને મધુબનીમાં ડીઈઓ તરીકે કામ કરતા રજનીકાંત પ્રવીણ પર આવકના જાણિતા સ્રોત કરતાં વધુ સંપત્તિ હોવાના આક્ષેપો થયા હતા. વિજિલન્સ ટીમે બેતિયામાં રજનીકાંત પ્રવીણના આવાસ પર દરોડા પાડયા હતા તો સમસ્તીપુરમાં તેના સાસરીયા અને દરભંગામાં પણ કાર્યવાહી કરાઈ હતી. 

રસપ્રદ વાત એ છે કે જેના ઘરમાંથી કરોડો રૂપિયાની રોકડ જપ્ત થઈ તે અધિકારી પ્રવીણ બેતિયાના વસંત વિહારમાં ભાડાંના મકાનમાં રહે છે. તેના ઘરે વિજિલન્સની આઠ લોકોની ટીમ પહોંચી હતી. પ્રવીણના ઘરેથી એટલી જંગી સંખ્યામાં રોકડ મળી કે ટીમે તેની ગણતરી માટે રૂપિયા ગણવાના મશીન લાવવા પડયા હતા.સબ ડિવિઝનલ પોલીસ અધિકારી વિવેક દીપે કહ્યું કે, બેતિયામાં પ્રવીણના ઘરે અધિકારીઓ પર્યાપ્ત પોલીસ સુરક્ષા સાથે પહોંચ્યા હતા. દરમિયાન શિક્ષણ વિભાગે ગુરુવારે સાંજે જ પ્રવીણને સસ્પેન્ડ કરી દીધો હતો. શિક્ષણ વિભાગ દ્વારા જારી કરાયેલા સરક્યુલર મુજબ રજનીકાંત પ્રવીણને તેની સામે વિજિલન્સ વિભાગે લીધેલાં પગલાં બદલ તાત્કાલિક અસરથી કાઢી મુકવામાં આવે છે. પુર્ણિયામાં શિક્ષણ વિભાગના નાયબ ડિરેક્ટર અધિકારી તરીકે પ્રવીણની ટ્રાન્સફર કરાઈ હતી.

Reporter: admin