ચોમાસાની સીઝન ચાલી રહી છે જેથી વડોદરા શહેર-જિલ્લામાં મેઘરાજા ધોધમાર વરસાદની બેટિંગ કરી રહ્યા છે. પરંતુ આ બધા વચ્ચે અનેક જગ્યાએથી મકાનો ધરાશાયી થવાની ઘટનાઓ સામે આવી રહી છે. 

ગતરોજ વડોદરાના વાડી વિસ્તારમાં જર્જરિત મકાન ધરાશાયી થયું અને હવે આજે પાદરાના ચોકારી ગામમાં એક મકાન ધરાશાયી થવાની ઘટના સામે આવી છે. વડોદરા જિલ્લાના પાદરા ખાતે આવેલ ચોકારી ગામના શાહપુરા વિસ્તારમાં એક મકાન ધરાશાયી થયું. વહેલી સવારે બનેલી આ ઘટનામાં મકાનધારક સહિત છ લોકો મકાન પડતા કાટમાળમાં દબાયા હતા. જેના કારણે તમામ ઈજાગ્રસ્ત થયા હતા. 

જેથી ઈજાગ્રસ્તોને સારવાર અર્થે વડોદરાની સયાજી હોસ્પિટલ ખાતે ખસેડવામાં આવ્યા. ઘટનાની જાણ થતા વડુ પોલીસ ઘટના સ્થળે પહોંચી તપાસ હાથ ધરી હતી.જોકે, વડોદરા શહેરના વાડી વિસ્તારમાં પણ ગતરોજ એક જર્જરીત મકાન ધરાશાયી થયું હતું. વાયડાપોળમાં એક મકાનમાં માતા અને પુત્રીનો રહેતા હતા. ત્યારે ગઈકાલે અચાનક જ મકાન ધરાશયી થયું હતું. ઘટનાની જાણ થતા ફાયર વિભાગની ટિમ તાત્કાલિક ઘટના સ્થળે પહોંચી માતા પુત્રીને બહાર કાઢ્યા હતા. જોકે, સદનસીબે આ દુર્ઘટનામાં કોઈ જાનહાની થઇ ન હતી.

Reporter: admin