આજરોજ તારીખ 28 /6 ને શુક્રવારના રોજ વડોદરા સેન્ટ્રલ જેલ ખાતે, બોર્ડની પરીક્ષામાં ઉત્તીર્ણ થનાર કેદી ભાઈબહેનોનો અભિવાદન કાર્યક્રમ, વડોદરા શહેર શાળા સંચાલક મંડળના પ્રમુખ આર.સી. પટેલના અધ્યક્ષ સ્થાને યોજાયો.
પ્રારંભમાં સ્વાગત પ્રવચનમાં શહેરના આજીવન શિક્ષક શંકરલાલ ત્રિવેદીએ વિસ્તૃત માહિતી સાથે ઉત્તીર્ણ કેદી ભાઈ બહેનોને અભિનંદન આપ્યા. વધુમાં આ વર્ષે પણ પરીક્ષાાર્થીઓને શૈક્ષણિક કીટ અને મોમેન્ટો દ્વારા અભિવાદન કરવામાં આવશે તેમ જણાવ્યું. આર.સી. પટેલે ઉપસ્થિત સર્વેને જણાવ્યું કે, શિક્ષણ દ્વારા કેદી ભાઈઓ સમાજના નવીન પ્રવાહોમાં જોડાઈને કૌટુંબિક જીવનમાં અને સમાજમાં દૂધમાં સાકરની જેમ ભળી જાય તે ઇચ્છનીય છે.
ઉત્તીર્ણ થનાર કેદી ભાઈઓને મોમેન્ટો અને પુસ્તકો આપી અભિવાદન કરવામાં આવ્યું. આ પ્રસંગે સિનિયર જેલર વિપુલ બારીયા, અધિક્ષક એમ.એ. ચૌધરી જેલરઓ સુજાનસિંહ ચુડાસમા અને અશોક સિંહ જાડેજા, વેલફેર ઓફિસર મહેશ રાઠોડ ઉપસ્થિત રહ્યા. વેલફેર ઓફિસરએ સમગ્ર કાર્યક્રમનું સફળ આયોજન કર્યું અને બંને શાળા સંચાલક શિક્ષકો તથા સર્વે નો આભાર માન્યો.
Reporter: News Plus
