વડોદરા શહેર તેમજ ગ્રામ્ય વિસ્તારોમાં મગરો બહાર આવીને સોસાયટીમાં ઘુસી જવાની ઘટનાઓ સામે આવી છે. ત્યારે આવી જ એક વધુ ઘટના સામે આવી છે વડોદરાના ભાયલી ખાતે થી કે જ્યાં મોડી રાતે એક મહાકાય મગરે દેખા દેતા સ્થાનિકોમાં ભારે ફફડાટ ફેલાયો.
વડોદરા શહેર તેમજ ગ્રામ્ય વિસ્તારમાં મુશળધાર વરસેલા વરસાદના કારણે ઘોડાપૂરની સ્થિતિ થઈ હતી. ઘોડાપૂરની સ્થિતિમાં વિશ્વામિત્રી નદીમાંથી અનેક મગરો બહાર આવી ગયા હતા. જેમ-જેમ પાણી ઓસરી રહ્યા છે તેમ તેમ નાનાથી લઈને મોટા મગરો બહાર આવી રહ્યા છે. ત્યારે હવે વડોદરાના ભાયલી ખાતે ખારીયાવાસ વિસ્તારમાં વરસાદી પાણી સાથે દસ ફૂટનો મહાકાય મગર ઘુસી આવ્યો હતો. જેના કારણે લોકોમાં ભયનો માહોલ ઉભો થયો.જે દરમિયાન ભાયલીના યુવાને મગરને જોતા જ શ્રીસાઈ દ્વારકામાઈ ચેરીટેબલ ટ્રસ્ટને જાણ કરી હતી.
જેના બાદમાં આ અંગે ફોરેસ્ટ ડિપાર્ટમેન્ટને જાણ કરી હતી. જેથી પ્રાણી જીવરક્ષા ની ટીમ જયારે મગરનું રેસ્ક્યુ કરવા સ્થળે પહોંચી ત્યારે સાત ફૂટ ઊંડા પાણીથી ભરેલા ખાડામાં દસ ફૂટનો મહાકાય મગર આરામ ફરમાવી રહ્યો હતો. જેથી ખાડામાં પાણી હોવાથી ફાયર બ્રિગેડની મદદથી પાણી ઉલેચાયુ અને પછી પાણી ઓછું થતા મગરનું રેસ્ક્યુ કરવાની કામગીરી હાથ ધરવામાં આવી. આખરે ભારે જહેમત બાદ મહાકાય મગરનુ રેસ્ક્યુ કરવામાં સફળતા મળી. મગરનું સફળતાથી રેસ્ક્યુ થતાં ભાયલી સીમના લોકોએ રાહતનો શ્વાસ લીધો. જયારે રેસ્ક્યુ કરાયેલા મહાકાય મગરને વન વિભાગને સોંપવામાં આવ્યો.
Reporter:
