ગઈ કાલે સાયબર ક્રાઈમ, મકરપુરા અને અટલાદરા પોલીસ સ્ટેશનમાં FIR
ચૂંટણી વચ્ચે વડોદરામાં ઓનલાઈન છેતરપીંડીના કિસ્સાઓ વધ્યા, લાખો રૂપિયાની ઠગાઈ
વડોદરા શહેરમાં સ્થાનિક સ્વરાજ્યની ચૂંટણીના મધ્યમાં ગઈ કાલે છેતરપીંડી અને સાયબર ક્રાઈમના ત્રણ અલગ- અલગ કેસ નોંધાયા છે. આ કેસમાં કુલ ૨૬ લાખથી વધુ રૂપિયાની ઠગાઈના આરોપ છે. સાયબર ક્રાઈમ પોલીસ સ્ટેશન, મકરપુરા અને અટલાદરા પોલીસ સ્ટેશનમાં અલગ- અલગ ફરિયાદો દાખલ કરવામાં આવી છે.સાયબર ક્રાઈમ પોલીસ સ્ટેશનમાં મયુરકુમાર મહેન્દ્રસિંહ રાઠોડ (ઉ.વ. ૩૭) નામના ફરિયાદીએ જણાવ્યું કે આરોપીઓએ ટેલીગ્રામ આઈડી દ્વારા Reliance Company Online Work ના નામે ટાસ્ક ક્લિયર કરવાના બહાને છેતરપીંડી કરી. ફરિયાદીને કુલ ૧૬,૫૬,૬૦૪ રૂપિયા ટ્રાન્સફર કરાવ્યા અને માત્ર ૪૧,૮૯૪ રૂપિયા પરત આપ્યા.
બાકીની ૧૬,૧૪,૭૧૦ રૂપિયાની રકમ હજુ મળી નથી. આ કેસમાં ભારતીય ન્યાય સંહિતા-૨૦૨૩ની કલમ ૩૧૮(૪), ૫૪, ૬૧(૨) તથા આઈ.ટી. એક્ટ ૬૬(ડી) હેઠળ ગુનો નોંધાયો છે. તપાસ પો.ઈન્સ. એ.એમ. પરમાર સંભાળી રહ્યા છે.મકરપુરા પોલીસ સ્ટેશનમાં ડો. ચીમનલાલ મોહનલાલ ચોટલીયા (ઉ.વ. ૫૨) એ ફરિયાદ કરી કે આરોપી રણજીત મુખીયા અને સંજીવ ઝા (એડમીશન ગુરુ OPC પ્રાઈવેટ લિમિટેડ)એ BGS ગ્લોબલ ઈન્સ્ટિટ્યુટ ઓફ મેડિકલ સાયન્સ, બેંગ્લોરમાં એડમીશન આપવાના બહાને ૭,૨૦,૦૦૦ રૂપિયા લીધા. એડમીશન ન આપ્યું અને રકમ પરત પણ ન કરી. આ કેસમાં કલમ ૩૧૮(૪), ૫૪ હેઠળ ગુનો નોંધાયો છે. તપાસ પો.સ.ઈ. પી.એ. ભેડા સંભાળી રહ્યા છે.અટલાદરા પોલીસ સ્ટેશનમાં મેહુલભાઈ દશરથભાઈ અગ્રાવત (ઉ.વ. ૫૨) એ ફરિયાદ કરી કે આરોપી રાજીવભાઈ હસમુખભાઈ પારેખ અને આયતન રાજીવભાઈ પારેખે દુબઈની હોટલ બુકિંગ, સાઈટસીઈંગ અને સ્કાઈડાઈવની વ્યવસ્થાના નામે ૨,૭૮,૩૨૧ રૂપિયા લીધા. કોઈ વ્યવસ્થા ન કરી અને રકમ પરત ન આપી. આ કેસમાં કલમ ૩૧૬(૨), ૩૧૮(૪), ૮૫૪ હેઠળ ગુનો નોંધાયો છે. તપાસ વી.જી. ભરવાડ સંભાળી રહ્યા છે.આ ત્રણેય કેસમાં આરોપીઓએ ઓનલાઈન અને ટેલીગ્રામ જેવા પ્લેટફોર્મનો ઉપયોગ કરીને ફરિયાદીઓ સાથે છેતરપીંડી કરી હોવાનો આરોપ છે. વડોદરા પોલીસે તમામ કેસમાં કાયદેસર તપાસ શરૂ કરી છે.ચૂંટણીના આ તબક્કે આવા સાયબર અને આર્થિક અપરાધો વધી રહ્યા હોવાથી સ્થાનિક લોકોમાં ચિંતા વ્યાપી છે. પોલીસે નાગરિકોને ઓનલાઈન ટાસ્ક, એડમીશન અને ટ્રાવેલ પેકેજના નામે આવતી લાલચથી સાવધ રહેવા અપીલ કરી છે. આ ઘટનાઓએ રાજકીય વર્તુળોમાં પણ ચર્ચા જગાવી છે.
Reporter: admin
