વડોદરા મહાનગરપાલિકાના વોર્ડ નંબર 3 ભાજપના કોર્પોટર પરાક્રમસિંહ જાડેજા સાથે જમીન વેચવાના બહાને ઠગાઇ કરવાના કેસમાં પોલીસ રિમાન્ડ પર રહેલા કમલેશ દેત્રોજાના બુધવારે રિમાન્ડ પૂરા થતાં પોલીસે તેને કોર્ટમાં રજૂ કર્યો હતો. 

કોર્ટે કમલેશને જેલમાં મોકલી આપવાનો આદેશ કર્યો હતો. બીજી તરફ મુખ્ય આરોપી દિલીપ ગોહિલની પણ સઘન શોધખોળ કરાઇ રહી છે પણ દિલીપ હજું પણ ફરાર છે.કોર્પોરેટર પરાક્રમસિંહ સાથે વડોદરા નગર પ્રાથમિક શિક્ષણ સમિતિના પૂર્વ અધ્યક્ષ દિલીપસિંહ ગોહિલ સહિત અન્ય બે આરોપી સામે ઠગાઇનો ગુનો નોંધાયો હતો. આ ગુનામાં ફરાર આરોપી કમલેશ દેત્રોજાને પોલીસે ઝડપી પાડ્યો હતો અને મંગળવારે કોર્ટમાં રજૂ કરી કમલેશ દેત્રોજાના કોર્ટે વધુ બે દિવસના રિમાન્ડ મેળવ્યા હતા. 

આ દરમિયાન પોલીસે કમલેશ દેત્રોજાના મોબાઈલ ફોન અંગે પુછપરછ કરી હતી.બીજી તરફ પોલીસે આ ગુનામાં વપરાયેલી કમલેશની કારને પણ કબજે કરી હતી. કમલેશ પાસેથી કેટલાક દસ્તાવેજો પણ કબજે કરાયા હોવાનું સુત્રોએ જણાવ્યું હતું જેથી પોલીસ દસ્તાવેજોની ચકાસણી કરી રહી છે. આ કેસના ફરાર મુખ્ય આરોપી ગુજરાત બહાર ભાગ્યો હોવાનું પોલીસને જાણવા મળ્યું છે જેથી પોલીસ તેનું મોબાઇલ ફોનનું લોકેશન ટ્રેસ કરી રહી છે. દિલીપને શોધવા વિવિધ સ્થળો પર પોલીસની ટીમો પણ મોકલાઇ છે પણ હજું તેના કોઇ સગડ મળ્યા નથી.

Reporter: admin