વડોદરા :હોળીની રાત્રે કારેલીબાગ વિસ્તારમાં ત્રણ ટુ-વ્હીલરને ટક્કર મારી એક મહિલાનું મોત નિપજાવનાર આરોપી રક્ષિત ચોરસિયાને પોલીસે રિમાન્ડ પર લીધો હતો. જોકે, આ દરમિયાન તેને છાતીમાં દુખાવો થતા સયાજી હોસ્પિટલમાં ખસેડવામાં આવ્યો છે. નોંધનીય છે કે, આરોપી પોલીસને પૂછપરછ થી બચવા માટે દુખાવાનું બહાનું કરતો હોવાનું પણ ચર્ચાઈ રહ્યું છે.

હોળીની રાત્રે કારેલીબાગ આમ્રપાલી વિસ્તારમાં પૂર ઝડપે કાર ચલાવતા રક્ષિત ચોરસિયાએ ત્રણ ટુ વ્હીલરને અડફેટ લીધા હતા. જેમાં આઠ વ્યક્તિઓને ઈજા થઈ હતી અને હેમાલી પટેલ નામની યુવતીનું મોત નિપજ્યું હતું. આ મહિલાના પતિ પુરવ પટેલને પણ સયાજી હોસ્પિટલમાં જ સારવાર માટે દાખલ કરવામાં આવ્યા છે. જેમની હાલત પણ અત્યંત નાજુક હોવાનું જાણવા મળ્યું છે. જ્યારે અન્ય ઇજાગ્રસ્ત માતા અને બે બાળકોને સયાજી હોસ્પિટલમાંથી અન્ય ખાનગી હોસ્પિટલમાં રીફર કરવામાં આવ્યા છે. આ કેસમાં પોલીસે કાર ચલાવતા રક્ષિત ચોરસિયાના રિમાન્ડ મેળવ્યા છે. તમામ ઈજાગ્રસ્તોમાં પટેલ અને કેવલાણી પરિવાર ફતેગંજ ટેક્સટાઇલ ટેકનો ટેકનિકલ સોસાયટીના રહેવાસી છે. તેમજ શાહ પરિવાર કારેલીબાગ બંસલ મોલની પાછળ દિપાવલી સોસાયટીના રહેવાસી છે.  જેમાં હેમાલીબેન પૂરવભાઈ પટેલનું મોત નિપજ્યું હતું.

અકસ્માતમાં ઈજા પામેલા અને મૃત્યુ પામેલા વ્યક્તિઓની યાદી
પુરવ દીપકભાઈ પટેલ, ઉં- 37 વર્ષ
હેમાલીબેન પુરવભાઈ પટેલ, ઉં- 36 વર્ષ
કોમલબેન અજીતભાઈ કેવલાણી, ઉં- 24 
જયેશ અનિલભાઈ કેવલાણી,ઉં- 18 
વિકાસ અજીતભાઈ કેવલાણી, ઉં- 22 
નિશાબેન આશિષભાઈ શાહ, ઉં- 35 વર્ષ
જૈનીલ આશિષભાઈ શાહ, ઉંમર- 8 વર્ષ
રેન્સી આશિષભાઈ શાહ, ઉંમર- 9 વર્ષ

Reporter: admin