શહેરમાં અનેક સ્થળોએ ડ્રેનેજની સમસ્યાથી લોકો પરેશાન થઇ ઉઠ્યા છે. અવારનવાર વિવિધ વિસ્તારોમાં ડ્રેનેજ ઉભરાતા લોકોએ હાલાકી વેઠવી પડી રહી છે. શહેરના વોર્ડ 14માં છેલ્લા કેટલાક સમયથી ડ્રેનેજની સમસ્યાથી લોકો હાલાકી વેઠી રહ્યા છે.
શહેરના વોર્ડ 14 માં ચાર દરવાજા પાસે આવેલી સેન્ટ્રલ બેન્કની ગલી પાસે જૈન દેરાસર મંદિરની પાસે છેલ્લા ઘણા દિવસથી ડ્રેનેજ ઉભરાઈ રહી છે. આ અંગે સ્થાનિક રહીશોએ વારંવાર પાલિકામાં રજૂઆત કરી છે છતાં કોઈ પણ ફરિયાદ સાંભળતું ન હોવાના આક્ષેપ સ્થાનિક રહીશો દ્વારા કરવામાં આવી રહ્યા છે. છાશવારે અહીં આ સમસ્યા સર્જાય છે પરંતુ તેનું કોઈ કાયમી નિકાલ કરવામાં આવતો નથી.સ્થાનિક સામાજિક કાર્યકર ફારૂક સોની દ્વારા જણાવવામાં આવ્યું હતું કે પાલિકા દ્વારા કોઈ પણ પ્રકારનું ધ્યાન આપવામાં આવતું નથી અને તેના કારણે લોકોએ હાલાકી વેઠવી પડી રહી છે. ત્યારે આ સમસ્યાનો ત્વરિત નિકાલ કરવામાં આવે તેવી માગ કરવામાં આવી છે.
Reporter: News Plus
