સુરત: ફરી એકવાર ઓવરબ્રિજ પર અકસ્માતની ઘટના બની છે. ઉધના દરવાજા ઓવરબ્રિજ પર આજે રવિવારે 20 ઓક્ટોબર એક પૂરપાટ દોડતી કારે બાઇકચાલકને અડફેટે લેતા તેમનું ઘટનાસ્થળે જ મોત નીપજ્યું હતું.
કારચાલક દારૂના નશામાં હોવાની હાલ આશંકા છે. કાર ચાલકની પોલીસે ધરપકડ કરી છે.અકસ્માત કારમાંથી એક ભાજપનો ખેસ, ગ્લાસ, થમ્સઅપ અને સિગારેટનું પેકેટ પણ મળી આવ્યું હતું. અકસ્માતમાં મોતને ભેટનાર 45 વર્ષીય સંજયકુમાર હરકિશન ધૂત હોવાનું સામે આવ્યું છે. માતા-પિતાને રેલવે સ્ટેશન લેવા જતા સમયે પુત્રનું મોત થતા પરિવાર ગમગીન છે. કરવા ચોથના દિવસે પતિનું મોત થતાં પત્નીની રડી-રડીને હાલત ખરાબ થઇ ગઇ હતી.મૃતક સંજય મૂળ રાજસ્થાનના છે પણ પરિવાર સાથે સુરતના સિટી લાઇટ વિસ્તારમાં સાકાર એપાર્ટમેન્ટમાં રહેતા હતા.
પરિવારમાં પત્ની અને એક દીકરો છે. સંજય કાપડનો વેપારી છે. આજરોજ વહેલી સવારે જોધપુરથી માતા-પિતા સૂર્યનગરી ટ્રેનમાં સુરત આવી રહ્યાં હતાં, તેથી સંજય તેમને લેવા માટે સ્ટેશન જઈ રહ્યા હતા તે દરમિયાન અકસ્માત થયો હતો.ઉધના દરવાજા ઓવરબ્રિજ પર અકસ્માત થયો હતો. વહેલી સવારે કારચાલકે બાઈકને અડફેટે લેતા ચાલકનું ઘટનાસ્થળે જ મોત નીપજ્યું હતું. કારચાલક નશામાં હોવાની આશંકા વ્યક્ત કરાઇ રહી છે. આ સાથે કારમાં થમ્સઅપની બોટલ, ગ્લાસ અને સિગારેટનું પેકેટ અને ભાજપનો ખેસ પણ મળી આવ્યો હતો.
Reporter: admin
