વડોદરા :શહેરના યુવક સાથે ઇન્વેસ્ટમેન્ટના નામે રુપિયા પડાવવાનું ઓનલાઇન ઠગોને ભારે પડયું છે અને પોલીસે દિલ્હીની ગેંગના ચાર સાગરીતોને દબોચી લીધા છે.જ્યારે ગેંગ ઓપરેટ કરતો સૂત્રધાર ફરાર થઇ જતાં તેની શોધખોળ હાથ ધરાઇ છે.
હરણીરોડના વિજયનગરમાં રહેતા સ્મિત જોષી નામના યુવકને સોશ્યલ મીડિયાના ગુ્રપમાં જોઇન કરી ઇન્વેસ્ટમેન્ટમાં શરૃઆતમાં ફાયદો કરાવી ૫૦૦ ટકા પ્રોફિટ અપાવવાની લાલચમાં ફસાવનાર ઠગોએ ₹૧૩.૭૦ લાખ પડાવી લીધા હતા.જેથી સાયબર સેલના પીઆઇ જે ડી પરમાર અને ટીમે મોબાઇલ અને બેન્ક ડીટેલ મેળવી તપાસ કરતાં પગેરું દિલ્હી પહોંચ્યું હતું.સાયબર સેલની એક ટીમે દસ દિવસ સુધી દિલ્હીના ગીચ વિસ્તાર પ્રિતમપુરામાં ધામો નાંખ્યો હતો અને ટેકનિકલ સર્વેલન્સને આધારે એક ઓફિસમાંથી ચાર પગારદારોને ઝડપી પાડયા હતા.
જેમાં અર્પિત વિજય ચૌધરી, દિપક નરેશભાઇ ઠાકુર(બંને રહે.ઉત્તમનગર, દિલ્હી),મોહિત તેજપાલસિંહ મદ્યાન (નજફગઢ,દિલ્હી) અને રાહુલ રાજેશભાઇ દલાલ(બહાદૂરગઢ,હરિયાણા)નો સમાવેશ થાય છે.વડોદરા સાયબર સેલની ટીમે દિલ્હીમાં ઠગોની ઓફિસમાં દરોડો પાડતાં તેઓ ચોંકી ઉઠયા હતા.પોલીસે ચાર જણાને ઝડપી પાડતાં તેઓ ૨૫ થી ૩૦ હજારના પગારદાર હોવાનું ખૂલ્યું હતું.પોલીસે ઓફિસમાં સર્ચ કરી ૫.૫૦ લાખની રોકડ કબજે કરી હતી.ચારેય યુવકોની પૂછપરછ કરતાં તેઓ મોબાઇલ ઓપરેટ કરતા હોવાની વિગતો ખૂલી હતી.જેથી પોલીસે સૂત્રધારને શોધવા દિલ્હી પોલીસની મદદ લીધી છે.
Reporter:
