ગુગલીયા પુરામાં દેશી દારૂનો છૂટક વેપલો કરતા અક્ષય મહેશભાઈ પરમાર દેશી દારૂનો જથ્થો લેવા અલવા ગામે ગયા હતા.

ત્યાંથી તેઓ પોતાની સફેદ એકટીવામાં દેશી દારૂનો જથ્થો કોથળામાં ભરી પરત આવી રહ્યા હતા ત્યારે પીપળીયા વાઘોડિયા રોડ વચ્ચે તંદુર હોટલ નજીક પુરપાટ ઝડપે એક્ટીવા હંકારતા ખાનગી યુનિવર્સિટીના પરપ્રાંતીય ત્રણ વિદ્યાર્થીઓની મેસ્ટ્રો બાઇક સાથે અકસ્માત સર્જયો હતો. ત્રણ પરપ્રાંતીય વિદ્યાર્થીઓને આ અકસ્માતમા શરીરે નાની મોટી ઇજાઓ પહોંચી હતી.તો દેશીદારુની ખેપ મારતા ખેપીયાને પણ માથાના ભાગે ગંભીર ઇજા પહોંચી હતી. રાહદારીઓએ 108 મારફતે ચારેયને પારુલ હોસ્પિટલમાં સારવારથી ખસેડ્યા હતા.લિમડા ગામ નજીક તંદુર હોટલ પાસે સર્જાયેલ અકસ્માતમાં એકટીવા અને મેટ્રોના ફુરચેફુર્ચા ઉડી ગયા હતા. 

અકસ્માતના સ્થળે એકટીવા માંથી દેશી દારૂની કોથળીઓ તૂટતા રોડ પર દારુનો રેલો થયો હતો જ્યારે કેટલીક પોટલીઓ વરસાદી કાસમા જઈ પડી હતી. ઘટના સ્થળે રાહદારીઓના ટોળેટોળા એકત્ર થતાં દેશી દારૂની પોટલીનો વિડીયો પોતપોતાના મોબાઇલમાં કેદ કર્યો હતો. ઘટના અંગેની જાણ વાઘોડિયા પોલીસને થતા તાત્કાલિક ઘટના સ્થળે પીસીઆરવાન મોકલી અકસ્માતની તપાસ હાથ ધરી હતી. મહત્વની વાત છે કે દેશી વિદેશી દારૂની ખેપ મારતા ખેપીઆઓ પોતાની જાન પર ખેલી પુરપાટ ઝડપે બાઈક હંકારતા જાહેર માર્ગ પર અન્યના જીવોને પણ જોખમમાં મૂકે છે ત્યારે આ ઘટનામાં પોલીસ કેવા પ્રકારની કાર્યવાહી કરે છે તે જોવું રહ્યું.

Reporter: admin