દેશભરમાં સપ્ટેમ્બર માસમાં "રાષ્ટ્રીય પોષણ માહ"ની ઉજવણી કરવામાં આવી રહી છે. પોષણમાહ ની ઉજવણી અંતર્ગત વડોદરામાં સયાજી ગર્લ્સ સ્કૂલ ખાતે જિલ્લા આયુર્વેદ વિભાગ દ્વારા બનાવેલ પોષણના કક્કા - એબીસીડી અને પોષણની પાંચ થીમની પરેડ યોજવામાં આવી હતી. 

જિલ્લા આયુર્વેદ અધિકારી ડૉ. સુધીર જોશી દ્વારા સયાજી ગર્લ્સ સ્કૂલ ખાતે રાજ્યમાં  આયુર્વેદના સિધ્ધાંત મુજબ પોષણના કક્કા અને ABCDની  પરેડ યોજવામાં આવી હતી. આ પરેડમાં પોષણની પાંચ થીમ એનીમિયા નિવારણ, ગ્રોથ મોનીટરીંગ, ટેક્નોલોજીના ઉપયોગ દ્વારા સુશાસન, પારદર્શિતા તથા કાર્યક્ષમ સેવા વિતરણ, પોષણ ભી પઢાઈ ભી અને પૂરક આહારની પાંચ થીમના ધ્વજ સાથે વિદ્યાર્થીઓ જોડાયા હતા.આ અંતર્ગત શાળાના ઇન્ટર્ન ડોકટર્સ રેવતી પ્રજાપતિ, પ્રિન્સી વસાવા તથા પંકિત શાહ દ્વારા માર્ગદર્શન આપતા વિધાર્થીઓને પોષણયુક્ત આહાર સંબંધિત પોષણની માહિતી આપતી કક્કો અને એબીસીડી દર્શાવતા પોસ્ટરો વિશે વિશેષ સમજૂતી આપી હતી. 

આ કાર્યક્રમમાં પોષણના કક્કામાં આયુર્વેદના ઔષધ, આહાર દ્રવ્યો કે જે સરળતાથી ઉપલબ્ધ છે સાથે જ પોષણમાં વધુ ગુણકારી છે તેને પસંદ કરી નવીન પ્રસ્તુતિ કરવામાં આવી હતી. આ ઉપરાંત આ શાળાના વિધાર્થીઓ દ્વારા પોષણના કક્કા અને ABCD નું ઉત્સાહભેર પઠન કરવામાં આવ્યું હતું. આ સાથે પોષણની પાંચ થીમને લોકો અનુસરીને વડોદરાને સમૃદ્ધ અને સુપોષિત બનાવે તે માટે જિલ્લા આયુષ અધિકારી ડૉ. સુધીર જોષી દ્વારા અપીલ કરવામાં આવી હતી.

Reporter: admin