અલ્પુ સિંધી સામે 55 ગુનાઓ અને 4 વખત પાસા...
સ્ટેટ મોનિટરીંગ સેલે ગુજરાતમાં ચાલતી ગેરકાયદેસર દારૂની સિન્ડીકેટના 13 સામે ગુજીસીટોક હેઠળ ગુનો નોંધી તેમની કમર તોડી નાખી હતી. તે બાદ આજે વડોદરા શહેર PCB શાખાએ લીસ્ટેડ બુટલેગર અલ્પુ સિંધી ગેંગના 8 સાગરીતો વિરૂદ્ધ ગુજીસીટોક હેઠળ ગુનો દાખલ કરતાં બુટલેગરોમાં ફફડાટ વ્યાપી ગયો છે. વડોદરા શહેરમાં મારા મારી અને દારૂના ગેરકાયેદસર ચાલતા ધંધામાં પોતાની ધાક જમાવવા લીસ્ટેડ બુટલેગર અલપેશ ઉર્ફે અલ્પુ હરદાસમલ વાધવાણી (સિંધી)એ પોતાની ગેંગ બનાવી થોડા સમય પહેલા ફતેગંજ બ્રિજ પર મારામારી કરતા તેની સામે હત્યાના પ્રયાસનો ગુનો નોંધાયો હતો. જોકે, ગુનો નોંધતા અલ્પુ સિંધી પોલીસ ધરપકડ ટાળવા ફરાર થઇ ગયો હતો.

એક બાદ એક અલ્પુ સિંધી સામે પ્રોહિબીશન સહિત ગંભીર ગુના નોંધાતા તમામ ગુનાઓની સમીક્ષા કરવામાં આવી હતી. જેમાં આ ગેંગ બનાવી પોતાના સાગરીતો સાથે મળી જુદા-જુદા રાજ્યોમાંથી લાવી હેરાફેરી કરતો હોવાનું ખુલ્યું હતુ. આખરે પોલીસે લીસ્ટેડ બુટલેગર અલ્પુ સિંધી સહિત 8 સામે ગુજરાત આતંકવાદી કૃત્ય અને સંગઠિત ગુના નિયંત્રણ અધિનિયમ–2015 હેઠળ (ગુજસીટોક) ગુનો નોંધી ત્રણની ધરપકડ કરી હતી. ઉલ્લેખનીય છે કે, થોડા દિવસો પહેલા સ્ટેટ મોનિટરીંગ સેલે ગુજરાતમાં ચાલતા ગેરકાયદેસર દારૂના ધંધામાં સામેલ રાજસ્થાનની બિશ્નોઇ ગેંગ અને વડોદરાની સિંધી ગેંગના નીલુ સિંધી સહિત કુલ 13 સામે ગુનો નોંધ્યો હતો. જેમાં નીલુ સિંધી હાલ પોલીસ રિમાન્ડ પર છે.

8 બુટલેગરો સામે ગુનો નોંધાયો...
પોલીસે અલ્પેશ ઉર્ફે અલ્પુ હરદાસમલ વાધવાણી (સિંધી), (રહે. સંતકવર કોલોની વારસીયા, વડોદરા) હરેશ ઉર્ફે હરી ચંદ્રકાંત બ્રહ્મક્ષત્રીય (રહે. એસ.કે કોલની વારસીયા, વડોદરા) કમલેશ ઉર્ફે પપ્પુ વિનોદભાઇ ડાવર (રહે. બેસીક રેસીડન્સી, ખોડીયારમગર વડોદરા) યશ મહેશભાઇ ચાવતા (રહે. સિંધુ પાર્ક સોસા. વારસીયા, વડોદરા) જુબેર સફીભાઇ મેમણ (રહે. મોગલવાડા, કીતાબઘરની પાછળ વાડી, વડોદરા) મોહીત ઉર્ફે બટકો પ્રકાશભાઇ મનવાણી (રહે. સંતકવર કોલોની, વારસીયા વડોદરા) ધર્મેશ ઉર્ફે ગોલુ ઇન્દ્રકુમાર સચદેવ (રહે. જગદીશ પાર્ક ફ્લેટ વારસીયા, વડોદરા) રવિ બીમનદાસ દેવજાણી (રહે. દાજીનગર સોસા. વારસીયા રોંગ રોડ, વડોદરા) સામે ગુનો નોંધ્યો હતો. 

અલ્પુ સિંધી સામે 55 ગુના...
પોલીસે જણાવ્યું હતું કે અલ્પેશ ઉર્ફે અલ્પુ હરદાસમલ વાધવાણી (સિંધી) સામે 55 ગુનાઓ અને 4 વખત પાસા, હરેશ ઉર્ફે હરી ચંદ્રકાંત બ્રહ્મક્ષત્રીય સામે 46 ગુનાઓ અને 6 વખત પાસા, કમલેશ ઉર્ફે પપ્પુ વિનોદભાઇ ડાવર સામે 22 ગુનાઓ અને 3 વખત પાસા, યશ મહેશભાઇ ચાવલા સામે 22 ગુનાઓ અને 1 વખત પાસા, જુબેર સફીભાઇ મેમણ સામે 66 ગુનાઓ અને 2 વખત પાસા, મોહીત ઉર્ફે બટકો પ્રકાશભાઇ મનવાણી સામે 13 ગુનાઓ અને 1 વખત પાસા, ધર્મેશ ઉર્ફે ગોલુ ઇનદ્રકુમાર સચદેવ સામે 14 ગુનાઓ અને 2 વખત પાસા તથા રવિ બીમનદાસ દેવજાણી સામે 20 ગુનાઓ અને 3 વખત પાસા નોંધાયેલા છે.

Reporter: admin