ગુનાહિત પ્રવૃત્તિને અટકાવવા માટે પાણીગેટ હદ વિસ્તારમાં હાથ ધરવામાં આવેલા પેટ્રોલિંગ દરમિયાન ત્રણ શખ્સોની પોલીસે ચોરીના આરોપમાં ધરપકડ કરીને બે લાખ ઉપરાંતનો મુદ્દા માલ કબજે લઇ કાયદેસરની કાર્યવાહી હાથ ધરી છે.

 શહેરમાં છાસવારે બનતા ચોરીના બનાવોને અટકાવવા માટે પાણીગેટ પોલીસે તેમના હદ વિસ્તારમાં નાઈટ પેટ્રોલિંગ હાથ ધર્યું હતું. વાઘોડિયા રોડ પર બાતમીના આધારે મહાકાળી સોસાયટીની નજીકમાં નાઈટ પેટ્રોલિંગ કરતી પોલીસે શકના આધારે સાયકલ પર જતાં ત્રણ શખ્સોને રોકી પૂછપરછ હાથ ધરી હતી. પોલીસની ઘનિષ્ઠ પુછપરછમાં ભાંગી પડેલા ત્રણેય શત્સોએ સાયકલો ચોરીની હોવાની કબુલાત કરી હતી. વધુ પુછપરછમાં ત્રિપુટીએ મંદિરની દાનપેટીમાંથી એલઇડી લાઇટો તથા લોખંડની એંગલો ચોરી કરી હોવાની કબુલાત કરી હતી. 

આ તમામ ચોરીઓ છેલ્લા બે માસમાં કરી હોવાની વિગતો બહાર આવતા પાણીગેટ પોલીસે ચોરીના આરોપમાં આરોપી સાગર હસમુખભાઈ ગાંધી રહે, મહાકાળી મંદિર પાસે, કિશનવાડી સંજય વિજય તડવી રહે, બી /14, ગીરીરાજ સોસાયટી કિશનવાડી તથા રાકેશ ઉર્ફે રાખો સોમાભાઈ વાઘેલા રહે, અજબડી બિલનો ટેકરો, પાણીગેટની પોલીસે ધરપકડ કરી હતી. પોલીસે આરોપી ત્રિપુટી પાસેથી મંદિરની દાનપેટીમાંથી ચોરેલી રોકડ, ૯૬ નંગ એલઇડી લાઇટો 25 લોખંડની એગલો તથા આંઠ સાયકલો સહિત ₹2,19,670 નો મુદ્દા માલ કબજે લઈ કાયદેસરની કાર્યવાહી હાથ ધરી છે.

Reporter: Amit Shah