શહેરના નવા ચીફ ફાયર ઓફિસર મનોજ પાટીલની નિમણુંક તો થઇ ગઇ છે પણ ફાયર બ્રિગેડની કોઇ જ પ્રકારની કામગિરીનો અનુભવ ના હોવાથી તેઓ અટવાઇ ગયા છે અને તેમના કારણે લોકોને પણ ભારે પરેશાનીનો સામનો કરવો પડી રહ્યો છે. બિન અનુભવી ફાયર ઓફિસર મનોજ પાટીલે ચાર્જ લીધે 25 દિવસ જેટલો સમય વીતી ગયો છે પણ તેમણે હજુ સુધી 218 એનઓસીની અરજીઓમાં એનઓસી આપી નથી. એનઓસીની  218 જેટલી અરજીઓ હાલ પેન્ડીગ છે જેથી અરજદારોને ભારે તકલીફનો સામનો કરવો પડી રહ્યો છે. અને એનઓસી મેળવવા માટે ધક્કા ખાઇ રહ્યા છે. 

વડોદરા શહેરના મ્યુનિ.કમિશનરના પ્રતાપે શહેરને એવો ચીફ ફાયર ઓફિસર મળ્યો છે કે જેને ચીફ ફાયર ઓફિસરનો કોઇ જ અનુભવ નથી. તેણે કોઇપણ નગરપાલિકા કે મહાનગરપાલિકામાં ફિલ્ડમાં પણ કામ કર્યું નથી અને તેમની પાસે યોગ્ય લાયકાત પણ નથી છતાં ઉચ્ચ અધિકારીઓના આશિર્વાદથી તેઓ ચીફ ફાયર ઓફિસર બની ગયા છે. ભલે તેઓ લાગવગ ભલામણથી સીએફઓ બની ગયા પણ હવે શું કામ કરવું તેની ગતાગમ તેમને પડતી નથી અને તેના કારણે તેમણે ચાર્જ સંભાળ્યો છે ત્યારબાદ એનઓસી મેળવવા માટે આવેલી 218 અરજીઓ પેન્ડિગ છે. કારણ કે તેમને ખબર જ પડતી નથી. કે એનઓસી કેવી રીતે અપાય અને ના અપાય. એનઓસી આપવા શું શું ધારાધોરણો અને નિયમોનું પાલન કરવું પડે...ફાયર બ્રિગેડમાં કોઇ પણ અરજદાર અલગ અલગ પ્રકારની એનઓસી માટે અરજી કરે છે જેમાં પ્રોવિઝનલ એનઓસી, ફાઇનલ એનઓસી અને ટેમ્પરવરી એનઓસી, ઇલેક્ટ્રિક ટેમ્પરવરી એનઓસીનો સમાવેશ થાય છે. હવે આ 218 અરજીઓ પર નવા સીએફઓએ સહી જ કરી નથી અને તેથી અરજીઓ પેન્ડિગ રહેતા ધુળ ખાઇ રહી છે અને અરજી કરનારા બિચારા અરજદારો રોજ ધક્કા ખાઇ રહ્યા છે અને પોતાના ચંપલ ઘસી રહ્યા છે. તેમના રુપિયા પણ રોકાઇ ગયા છે. રાણાજી -સત્તાધીશોની એક ભૂલ નાગરીકોને કેટલી ભોગવવી પડે છે તેનો આ ઉત્તમ નમુનો છે જ્યાં અધિકારીને ખબર જ નથી કે તેણે શું કરવાનું છે. નવા સીએફઓને ગુજરાતી ભાષા બોલતા પણ આવડતું નથી અને તેઓ હિન્દી ભાષાનો પ્રયોગ કરે છે જેથી સામાન્ય નાગરીક સાથે તેઓ સીધો સંપર્ક કરી શકતા નથી. સામાન્ય વ્યક્તિ જ્યારે તેમને મળવા આવે ત્યારે તેમને દુભાષીયાને સાથે રાખીને વાતચીત કરવી પડે છે. દુભાષીયો પણ ફાયરમેન જ છે જેને પોતાનું કામ છોડીને સીએફઓને મદદ કરવાનું કામ કરવું પડે છે. જાણવા મળ્યા મુજબ નવા સીએફઓ સાહેબે ફાયર વિભાગમાં નવો ચીલો ચાતર્યો છે અને પોતાનો એક અનઓફિશીયલી પીએ એટલે કે અંગત મદદનિશ પણ રાખ્યો છે જે રોજે રોજ નવા સીએફઓ સાહેબને ફાયર બ્રિગેડમાં શું કામ કરવાનું હોય છે તે શીખવાડે છે. નવા સીએફઓ સાહેબ પોતાના જુનિયર પાસે ફાયર બ્રિગેડના પાઠ શીખી રહ્યા છે અને આ જ વડોદરા શહેરની કરુણતા છે.

નવા સીએફઓ પીએ પાસેથી ફાયરની કામગિરીનો કક્કો શીખે છે.   વડોદરાવાસીઓનું કિસ્મત તો જુવો કે કોર્પોરેશનના અધિકારીઓના પાપે તેમને એવા ચીફ ફાયર ઓફિસર મળ્યા છે જેમને ફાયર વિભાગનો કોઇ જ અનુભવ નથી. લાગવગના જોરે તેઓ ફાયર વિભાગમાં જોડાઇ તો ગયા છે પણ હવે મુસીબત એ ઉભી થઇ છે કે તેમને કામ શું કરવું તેની ગતાગમ સુદ્ધાં પડતી નથી જેથી તેમણે એક અનઓફિશીયલી પીએ રાખ્યો છે અને આ પીએ મહાશય પોતાના સાહેબને ફાયર બ્રિગેડનો કક્કો શીખવાડી રહ્યા છે. ફાયર વિભાગ જોઇન કર્યા પછી ફાયર બ્રિગેડની કામગિરી શીખવી તે તો વડોદરા ફાયર બ્રિગેડમાં જ જોવા મળે. ફાયર વિભાગની તો જાણે કે પનોતી બેઠી છે અને બિચારા જુનિયર ફાયર ઓફિસરો અને ફાયરમેનોને એવા સાહેબનો આદેશ માનવો પડે છે જેમને કંઇ આવડતું જ નથી. બિન અનુભવી ચીફ ફાયર ઓફિસર જ્યારે તેમના ફાયરમેન કર્મચારીઓ સાથે મીટીંગ કરે છે ત્યારે તેઓ ગુજરાતીમાં નહીં પણ હિન્દી મા મીટીંગ કરે છે.  ફાયર બ્રિગેડના ઇતિહાસમાં આ પહેલો બનાવ હશે તેમાં સીએફઓએ પોતાનો અંગત પીએ રાખ્યો હોય.

Reporter: