ભરૂચ: તાજેતરમાં ભરૂચમાં ડ્રગ્સના ઉત્પાદનના બે મોટા કાવતરા ઝડપાયા બાદ હવે ડ્રગની હેરફેરનુ કાવતરું ઝડપાયું છે.
પોલીસે 22 લાખ ઉપરાંતનો મુદ્દામાલ કબ્જે કરી એક હિસ્ટ્રીશીટર સાથે ત્રણ કેરિયરની ધરપકડ કરી છે જયારે એક ફરાર થઇ ગયો છે. ભરૂચ બી ડિવિઝન અને રૂરલ પોલીસની ટીમને દિલ્હી - મુંબઈ એક્સપ્રેસ વે પર MD ડ્રગ્સની હેરફેર કરવામાં આવી રહી હોવાની બાતમી મળતા કારેલી ગામ નજીક વોચ ગોઠવવામાં આવી હતી. બાતમી અનુસારની ઇનોવા કાર આવતા તેને અટકાવી જડતી લેવામાં આવતા ભરૂચના દેરોલનો ઇલ્યાસઅલી હુસૈન મલેક, અશરફ બશીરભાઇ મુન્સી અને હનીફ રાજ કારમાંથી મળી આવ્યા હતા.
વાહનની તપાસ દરમિયાન 180 ગ્રામ એમડી ડ્રગ્સ મળી આવ્યું હતું જેની કિંમત 18 લાખ રૂપિયા જેટલી થાય છે.ડ્રગ્સનો આ જથ્થો મુંબઈથી રવાના થયો હતો જેને ભરૂચ સહીત આસપાસના વિસ્તારમાં છૂટક વેચાણ માટે મોકલવામાં આવ્યો હતો. મુંબઈના રઉફને વોન્ટેડ જાહેર કરી ભરૂચ પોલીસની એક ટિમ મુંબઈ રવાના કરવામાં આવી છે. ઝડપાયેલ આરોપીઓ પૈકી ઇલ્યાસ અલીહુસૈન મલેક નશીલા પદાર્થોના કારોબારના બે , બળાત્કારના એક અને મારામારીના એક ગુના મળી 4 ગુનામાં પોલીસ ચોપડે ચઢી ચુક્યો છે. એમડી ડ્રગ અને વાહન મળી 22 લાખ રૂપિયાનો મૂદ્દામાલ કબ્જે કરી ભરૂચ બી ડિવિઝન પોલીસ સ્ટેશનના પોલીસ ઇન્સ્પેકટર શુભેન્દુ ફૂલતરીયાને આગળની તોપાસ સોંપવામાં આવી છે.
Reporter: admin
