સાવલીના ધારાસભ્ય કેતન ઈનામદારે કરોડોના કૌંભાડને ખુલ્લુ પાડ્યું હતું 
વડોદરા જિલ્લાના ડેસર તાલુકાના મેરાકુવા ગામની દૂધ ઉત્પાદક સહકારી મંડળીમાં કરોડો રૂપિયાના નાણાંકીય કૌભાંડના ભાજપના ધારાસભ્યએ આક્ષેપ કર્યા હતા. 

આ સમગ્ર મામલે વડોદરા જિલ્લા સહકારી મંડળીઓના રજિસ્ટ્રાર દ્વારા તપાસ શરુ કરાઇ છે, ગુરુવારે સાવલીના ધારાસભ્ય કેતન ઈનામદારે બરોડા ડેરીના મેનેજિંગ ડિરેક્ટર ઉપરાંત મુખ્યમંત્રી, સહકાર મંત્રી અને ડેરીના ચેરમેન સહિત 9 જગ્યાએ પત્ર લખી તપાસ કરી કાર્યવાહીની માંગ કરી છે. મંડળીના પ્રમુખ, મંત્રી અને સુપરવાઈઝરે મરણ પામેલા સભાસદોના નામે દૂધ ભરાવ્યું હોવાનું બતાવી બેંક ખાતામાંથી લાખો રૂપિયા ઉપાડ્યા હોવાનો ધારાસભ્યએ દાવો કર્યો છે. ધારાસભ્યએ લખેલા પત્રમાં જણાવ્યુ છે કે, 65 કરતાં વધુ સભાસદોની પ્રવૃત્તિ પર શંકા છે. જેમાંથી 8 થી 10 સભાસદો, જેવા કે ભુરીબેન રમણભાઈ પરમાર, કાલુભાઈ મહીજીભાઈ પરમાર, ઉદાભાઈ છગનભાઈ ચૌહાણ વગેરેના મૃત્યુ થયા બાદ પણ તેમના ખાતામાં નિયમિત દૂધ ભરાવાનું અને રૂપિયા ઉપાડવાનું ચાલુ રહ્યુ છે. ત્યારે સવાલ એ છે કે, મૃત વ્યક્તિના ખાતામાં દૂધના રૂપિયા કેવી રીતે જમા થયા?, પૈસા કોણે ઉપાડ્યા?, શું ખાતા ખરેખર જીવિત હોવાનું દર્શાવાયું હતું?, અને શું દૂધની માત્રા સાથે અવ્યવસ્થિત ગણતરી કરવામાં આવી છે. કેટલા સમયથી આવું કૌભાંડ ચાલી રહ્યું છે?, દરેક સભ્ય દીઠ આશરે 60–70 લિટર દૂધ ભરાયેલું બતાવવામાં આવ્યું છે. તો શું આ સભાસદો પાસે આટલું પશુધન હતું? ધારાસભ્ય કેતન ઇનામદારે શંકા વ્યક્ત કરી છે કે આવી ગેરરીતિ માત્ર મેરાકુવા મંડળી સુધી સીમિત નથી. પરંતુ વડોદરા અને છોટાઉદેપુર જિલ્લાની અન્ય દૂધ મંડળીઓમાં પણ ઘણી શંકાસ્પદ પ્રવૃત્તિઓ ચાલી રહી છે. તેમણે દાવો કર્યો છે કે, બરોડા ડેરી અને વડોદરા સેન્ટ્રલ કો-ઓપરેટિવ બેન્ક દ્વારા વિસ્તારપૂર્વક તપાસ થાય તો પદાધિકારીઓની ભ્રષ્ટ પ્રવૃત્તિઓનો પર્દાફાશ થશે. કેતન ઈમાનદારે ચીમકી આપતા કહ્યુ છે કે, ગરીબ પશુપાલકોની મહેનત સાથે થયેલી છેતરપિંડી અત્યંત નીંદનીય છે. મૃત વ્યક્તિના નામે દૂધ ભરાવવું અને નાણાં ઉપાડવાં એ ગેરકાયદે ભ્રષ્ટાચાર છે. બરોડા કો-ઓપરેટિવ બેન્ક દ્વારા સંપૂર્ણ તપાસ થવી જોઈએ. આ મામલે બરોડા ડેરીએ તપાસ કરી દોષિત પદાધિકારીઓ સામે પગલાં લેવાં.

સહકારી મંડળીઓના જિલ્લા રજિસ્ટ્રારે તપાસ શરુ કરી...
સહકારી મંડળીઓના જિલ્લા રજિસ્ટ્રાર કચેરી દ્વારા જણાવાયું હતું કે ધારાસભ્ય કેતન ઇનામદારે કરેલી રજૂઆત બાદ કચેરી દ્વારા તપાસ શરુ કરાઇ છે અને તપાસ અહેવાલ આવ્યા બાદ આગળની કાર્યવાહી કરાશે. કચેરી દ્વારા બરોડા ડેરીના એમ.ડી ને પણ પત્ર લખીને ઉંડી તપાસ કરવા પણ જણાવાયું છે.

Reporter: admin