નવી દિલ્હી: મોદી સરકારે 70 વર્ષથી ઉપરના સિનીયર સિટીઝન્સને મોટી ભેટ આપી છે. કેન્દ્ર સરકારે આયુષ્માન ભારત યોજના હેઠળ 5 લાખ રૂપિયાની મફત સારવારની જાહેરાત કરી છે.
કેન્દ્ર સરકારની આરોગ્ય વીમા યોજના આયુષ્માન ભારત હેઠળ 70 વર્ષથી વધુ ઉંમરના તમામ લોકોને આવરી લેવાનો નિર્ણય કરવામાં આવ્યો છે. હવે 70 વર્ષ અને તેથી વધુ ઉંમરના તમામ લોકોને તેમની નાણાકીય સ્થિતિને ધ્યાનમાં લીધા વિના આ યોજના હેઠળ આવરી લેવામાં આવશે.ગઈકાલે મળેલી કેબિનેટની બેઠક બાદ આ અંગે માહિતી આપતાં કેન્દ્રીય પ્રધાન અશ્વિની વૈષ્ણવે (Ashvini Vaishnav) કહ્યું કે વડાપ્રધાન નરેન્દ્ર મોદીએ વચન આપ્યું હતું કે 70 વર્ષથી વધુ ઉંમરના તમામ વરિષ્ઠ નાગરિકોને આયુષ્માન ભારત પીએમ જન આરોગ્ય યોજના હેઠળ કવરેજ આપવામાં આવશે.
એટલે કે, આયુષ્માન ભારત પીએમ જન આરોગ્ય યોજના(AB PMJAY) હેઠળ ન આવતાં પરિવારોમાં હાજર 70 વર્ષથી વધુ ઉંમરના લોકોને પણ આ યોજનાનો લાભ મળશે. એક નવી શ્રેણી બનાવવામાં આવશે જેમાં 70 વર્ષથી વધુ ઉંમરના લોકોને 5 લાખ રૂપિયા સુધીની મફત સારવાર મળશે. કેન્દ્રીય પ્રધાન અશ્વિની વૈષ્ણવે કહ્યું કે 6 કરોડ વરિષ્ઠ નાગરિકો સહિત લગભગ 4.5 કરોડ પરિવારોને આ યોજના હેઠળ આવરી લેવામાં આવશે.કેન્દ્રીય પ્રધાન અશ્વિની વૈષ્ણવે કહ્યું કે આ એક મોટો નિર્ણય છે. વૃદ્ધોને 5 લાખ રૂપિયા સુધીની મફત સારવારની સુવિધા મળશે અને તેનાથી દેશના લગભગ 4.5 કરોડ પરિવારોને આવરી લેવામાં આવશે. 6 કરોડ લોકોને ફાયદો થશે.વડા પ્રધાન નરેન્દ્ર મોદીએ X પર કરેલી પોસ્ટમાં લખ્યું કે, “અમે દરેક ભારતીય માટે સુલભ, સસ્તી અને ઉચ્ચ ગુણવત્તાની આરોગ્યસંભાળ સુનિશ્ચિત કરવા માટે પ્રતિબદ્ધ છીએ.”
Reporter: admin
