૯૦૦૦ હજાર જેટલા કર્મયોગીઓની દિવસરાતની મહેનત બાદ મતદાર યાદીનો મુસદ્દો તૈયાર થયો, હવે વાંધા સુનાવણીનો તબક્કો

જિલ્લા ચૂંટણી તંત્ર દ્વારા રાજકીય પક્ષોના પ્રતિનિધિઓ સાથે બેઠક યોજી મુસદ્દારૂપ મતદાર યાદી આપી 
ભારતના ચૂંટણી પંચ દ્વારા સમગ્ર રાજ્યમાં હાથ ધરાયેલ સ્પેશિયલ ઇન્ટેન્સિવ રિવિઝન (SIR) અંતર્ગત વડોદરા જિલ્લામાં તારીખ 28મી ઓક્ટોબરથી મતદાર યાદી સુધારણા સંબંધિત કાર્યવાહી સુવ્યવસ્થિત અને આયોજનબદ્ધ રીતે અમલમાં મુકવામાં આવી હતી. જાહેરાત થયેલા દિવસથી આજ દિન સુધી આ કામગીરી વિવિધ તબક્કાઓમાં સતત આગળ ધપાવવામાં આવી છે, જેમાં જિલ્લા સ્તરે વિશાળ માનવ સંસાધન અને સંકલિત ટીમવર્કના આધારે કામગીરી પૂર્ણ કરવામાં આવી છે. જિલ્લા ચૂંટણી અધિકારી ડો. અનિલ ધામેલિયાએ જણાવ્યું કે, વડોદરા જિલ્લામાં આ પ્રક્રિયા માટે કુલ 10 મતદાર નોંધણી અધિકારીઓ (EROs), 27 સહાયક મતદાર નોંધણી અધિકારીઓ (AEROs), અંદાજે 2,576 બૂથ લેવલ અધિકારીઓ (BLOs) તેમજ રાજકીય પક્ષો દ્વારા નિમણૂક કરાયેલા આશરે 2,780 બૂથ લેવલ એજન્ટ્સ (BLAs) કાર્યરત રહ્યા હતા. આ ઉપરાંત લગભગ 4,000 જેટલા સહાયક કર્મચારીઓ અને સ્વયંસેવકો તથા અંદાજે 1,500 જેટલા રેવન્યુ સ્ટાફ અને અન્ય વિભાગોના કર્મચારીઓએ પણ આ સમગ્ર કામગીરીમાં સક્રિય ભાગીદારી નોંધાવી હતી. આ રીતે કુલ મળીને લગભગ 9,000 જેટલા કર્મચારીઓ અને સ્વયંસેવકોના સંયુક્ત પ્રયત્નોથી આ વિશાળ કામગીરી પૂર્ણ કરવામાં આવી છે. વિવિધ સ્વયંસેવી સંસ્થાઓના પ્રતિનિધિઓ, સોસાયટી સેક્રેટરીઓ તથા કોલેજના વિદ્યાર્થીઓએ પણ અલગ-અલગ તબક્કે નોંધપાત્ર સહયોગ આપ્યો હતો. આ સમગ્ર પ્રક્રિયાની વિશેષતા એ હતી કે આ કામગીરી સંપૂર્ણ સમય માટે સમર્પિત ન રહી, પરંતુ સંબંધિત અધિકારીઓ અને કર્મચારીઓએ પોતાની નિયમિત ફરજોની સાથોસાથ આ જવાબદારી સફળતાપૂર્વક નિભાવી હતી. સમગ્ર કામગીરીના પાયામાં બૂથ લેવલ અધિકારીઓનું યોગદાન અત્યંત મહત્વપૂર્ણ રહ્યું છે. મતદાર યાદીનું વિતરણ, સંકલન, મેપિંગ, મેચિંગ તથા ડેટા એન્ટ્રી જેવી મહત્વની જવાબદારીઓ તેમણે અત્યંત મહેનત, નિષ્ઠા અને પ્રતિબદ્ધતાપૂર્વક પૂર્ણ કરી છે. આ સમગ્ર કામગીરીના યશ માટે બીએલઓની ભૂમિકા વિશેષ રૂપે ઉલ્લેખનીય છે. તેમ છતાં, બીએલઓ, બીએલએ, સહાયક કર્મચારીઓ, સ્વયંસેવકો અને અન્ય તમામ વિભાગોની સંકલિત ટીમવર્ક વિના આ પ્રક્રિયા શક્ય બની ન હોત. મતદાર નોંધણી અધિકારીઓના માર્ગદર્શન હેઠળ જિલ્લા કક્ષાની ટીમ દ્વારા સતત સંકલન જાળવવામાં આવ્યું હતું. 

ખાસ કરીને મેપિંગ પ્રક્રિયા દરમિયાન સેન્ટ્રલાઇઝ્ડ ટીમની રચના કરીને કાર્ય કરવામાં આવ્યું હતું. ચૂંટણી પંચ, રાજ્ય સરકાર તથા મુખ્ય ચૂંટણી અધિકારીની કચેરી સાથે સતત સંપર્કમાં રહીને જરૂરી આયોજન અને અમલ કરવામાં આવ્યો હતો. આ સમગ્ર પ્રક્રિયાના પ્રથમ તબક્કાની સફળ પૂર્ણતાના અંતે આજે મુસદ્દા મતદાર યાદી (Draft Electoral Roll) પ્રસિદ્ધ કરવામાં આવી રહી છે, જેના અનુસંધાને રાજકીય પક્ષો સાથે બેઠક પણ યોજવામાં આવી છે. મુસદ્દા મતદાર યાદીની પ્રસિદ્ધિ ચૂંટણી પંચની વેબસાઇટ, રાજ્યની અધિકૃત વેબસાઇટ તથા જાહેર સ્થળોએ કરવામાં આવશે. મુસદ્દા મતદાર યાદી તૈયાર કરતી પ્રક્રિયામાં શરૂઆતમાં વડોદરા જિલ્લામાં કુલ 26,89,117 મતદારો નોંધાયેલા હતા, જેમાંથી 21,85,205 મતદારોનું સફળતાપૂર્વક ડિજિટાઇઝેશન કરવામાં આવ્યું છે. 503912 મતદારો કમી થયા છે. આમાંથી મોટા પ્રમાણમાં મતદારો દ્વારા સ્વયં મેપિંગ પ્રક્રિયા પૂર્ણ કરવામાં આવી છે. શરૂઆતમાં અનમેપ્ડ મતદારોની ટકાવારી વધુ હતી, પરંતુ બીએલઓ, બીએલએ અને સ્વયંસેવકોના સતત પ્રયત્નો થકી આ ટકાવારી નોંધપાત્ર રીતે ઘટાડવામાં આવી છે. અનમેપ્ડ મતદારોના નામ મુસદ્દા મતદાર યાદીમાંથી કાઢી નાખવામાં આવ્યા નથી અને તેઓ જરૂરી દસ્તાવેજો રજૂ કરીને પોતાનું નામ યથાવત રાખી શકશે.આગામી તબક્કામાં ક્લેમ્સ અને ઓબ્જેક્શન્સની પ્રક્રિયા શરૂ કરવામાં આવી છે, જેમાં મતદારો ફોર્મ નં. 6 અને 8 મારફતે પોતાના દાવા અને વાંધાઓ રજૂ કરી શકશે. જિલ્લાભરમાં ઓળખાયેલા વિવિધ કેન્દ્રો પર કાર્યદિવસોમાં નિર્ધારિત સમય દરમિયાન ફોર્મ સ્વીકારવાની વ્યવસ્થા કરવામાં આવી છે. સમગ્ર પ્રક્રિયા એક મહિના સુધી ચાલશે, જેના અંતે તમામ દાવા અને વાંધાઓની સુનાવણી બાદ અંતિમ મતદાર યાદી પ્રસિદ્ધ કરવામાં આવશે. આ સમગ્ર પ્રક્રિયા દરમિયાન મીડિયાએ પણ સકારાત્મક અને જવાબદાર ભૂમિકા ભજવી છે. વિવિધ માધ્યમો દ્વારા જનજાગૃતિ ફેલાવવામાં આવી છે, જેના પરિણામે મતદારોમાં નોંધપાત્ર ભાગીદારી જોવા મળી છે. ચૂંટણી પંચનો મુખ્ય હેતુ ત્રુટિરહિત, સમાવેશી અને વિશ્વસનીય મતદાર યાદી તૈયાર કરવાનો છે, જેથી કોઈપણ લાયક મતદાર બાકાત ન રહે અને ગેરલાયક મતદારોના નામ દૂર થાય. આ દિશામાં આગામી તબક્કાઓમાં પણ તમામનો સહયોગ અપેક્ષિત છે.કલેક્ટરશ્રી ઉપરાંત ચૂંટણી તંત્રના અધિકારીઓ દ્વારા રાજકીય પક્ષોના પ્રતિનિધિઓ સાથે પણ બેઠક યોજવામાં આવી હતી અને તેમને મુસદ્દારૂપ મતદાર યાદી આપવામાં આવી હતી.

Reporter: admin