ગાંધીનગર :એરપોર્ટ રોડ પર ભાટ સર્કલ પાસે આવતીકાલથી બે વર્ષ સુધીનું વાહનો માટે ડાયવર્ઝન આપવામાં આવશે. 

અહીં આઇકોનિક કેબલ સ્ટેડ બ્રિજનું કામ આખરે શરુ થવા જઇ રહ્યું છે. તેના સંબંધે હાલના ભાટ સર્કલને તોડી પાડવામાં આવ્યું છે. રુપિયા 120 કરોડની યોજના અંતર્ગત કામગીરી દરમિયાન દુર્ઘટના રોકવા મુખ્ય માર્ગ બંધ કરવા સાથે વાહન વ્યવહાર ચાલુ રહે તેના માટે રાતો રાત સર્કલની ફરતે સહિતના સર્વિસ રોડ્સ પણ તૈયાર કરી દેવામાં આવ્યાં છે.અમદાવાદ રીંગ રોડ પર આવેલા ભાટ સર્કલ પરથી દરરોજ 1 લાખ ઉપરાંત વાહનોની અવર જવર રહેતી હોવાથી ટ્રાફિક જામ અને અકસ્માતના બનાવો વ્યાપક બનતાં અહીં વૈષ્ણોદેવી સર્કલની જેમ ઉપર ઓવરબ્રિજ અને તેની નીચેથી અન્ડરપાસ આપવાની યોજના અમલી કરવામાં આવી છે. કોરોના કાળ, બ્રિજની ડિઝાઇન અને અમેરિકાથી આયાત થનારા કેબલને લઇને આ યોજના વિલંબમાં પડી હતી. 

પરંતુ હવે માર્ગ અને મકાન વિભાગ, પાટનગર યોજના વિભાગ, ગાંધીનગર મહાપાલિકા, ગાંધીનગર પોલીસ અને અમદાવાદ શહેરી વિકાસ સતામંડળના સહયારા પ્રયાસોથી અહીં ડાયવર્ઝન નિયત કરી દેવામાં આવ્યું છે. તારીખ ૧૮મી નવેમ્બરથી અમલી થનાર ડાયવર્ઝન હવે કેબલ સ્ટેડ બ્રિજ અને અન્ડર પાસ બંધાઇને તેનું લોકાર્પણ નહીં થાય ત્યાં સુધી અમલમાં રહેશે. ઇજનેરી સુત્રોના જણાવવા પ્રમાણે બે વર્ષ માટે ડાયવર્ઝન રહેવાની ધારણા છે. ડાયવર્ઝન પણ વાહન પરિવહન માટે સરળ અને સલામત રહે તેના માટે મહાપાલિકા દ્વારા દિવસ રાતના ધોરણે કામગીરી કરવામાં આવી હતી અને ગાંધીનગરથી ભાટ સર્કલ સુધીના રોડ પર એક કિલોમીટર જેટલો લાંબો સવસ રોડ ઉપરાંત સર્કલની ફરતે પણ જરૃરી સવસ રોડ તૈયાર કરી દેવાયાં છે.ગાંધીનગરથી વડોદરા અથવા અમદાવાદાના નરોડા અને નાના ચિલોડા તરફ જવા માંગતાં વાહન ચાલકો માટે પણ શાહપુર બ્રિજ થઇને આવવામાં સરળતા રહેશે.

Reporter: admin