નવસારી : જિલ્લાના ગણદેવી તાલુકાના બીલીમોરા શહેરમાં ગંભીર અકસ્માત સર્જાયો હોવાની ઘટના સામે આવી છે. 

બીલીમોરાના રેલવે ઓવરબ્રિજ પર એક્ટિવા અને કાર વચ્ચે થયેલી ભયાનક ટક્કરમાં એક્ટિવા સવાર બે પૈકી એક યુવકનું મોત થયું છે, જ્યારે એક યુવક ગંભીર હાલતમાં હાલ સારવાર હેઠળ છે. અકસ્માતની આ ગંભીર ઘટનાના હચમાચવી દેતા સીસીટીવી પણ સામે આવ્યા છે.યુવક દડાની જેમ હવામાં પાંચ ફૂટ ફંગોળાયો અકસ્માતની આ ઘટના અંગે મળતી માહિતી મુજબ બીલીમોરાના મોરલી ગામનો ધ્રુવીક પટેલ પોતાનું એક્ટિવા લઇને ભેસલા ગામના તેના મિત્ર સાથે ગતરાત્રે પસાર થઇ રહ્યો હતો. આ દરમિયાન બીલીમોરા શહેરના રેલવે ઓવરબ્રિજ પર સામેથી આવતી અર્ટિગા કારે ધડાકાભેર ટક્કર મારી હતી.

આ ગંભીર અકસ્માતમાં બંને યુવકને ગંભીર ઇજાઓ પહોંચતાં તુરંત સારવાર માટે નજીકની હોસ્પિટલમાં ખસેડવામાં આવ્યા હતા. ધ્રુવીક પટેલને ગંભીર ઇજાઓ પહોંચી હોવાથી બાદમાં તેને અન્ય ખાનગી હોસ્પિટલમાં લઇ જવાયો હતો. જ્યાં સારવાર દરમિયાન તેનું મોત થયું હતું. જ્યારે એક્ટિવા પાછળ બેઠેલા અને અકસ્માતમાં દડાની જેમ ફંગોળાયેલા ધ્રુવીક પટેલના મિત્રની હાલ સારવાર ચાલી રહી છે. હાલ પોલીસે કાર ચાલક સામે ગુનો નોંધી બંને વાહનો કબ્જે કરીને આગળની તપાસ હાથ ધરી છે.

Reporter: admin