વડોદરા-હાલોલ રોડ ઉપર બાઇક પર ઘરે જવા નીકળેલા યુવક ગાયની અડફેટમાં આવી જતાં 10 ફૂટ ઉછળીને ખાડામાં પડતા મોતને ભેટ્યો હતો. 108 મારફતે હોસ્પિટલ લઈ જતા તબીબે મૃત જાહેર કરતા પરિવારજનોના હૈયાફાટ રૂદને સન્નાટો પાથરી દીધો હતો. યુવકના પરિવારમાં પત્ની અને ત્રણ સંતાનો છે.પ્રાપ્ત માહિતી અનુસાર પંચમહાલ હાલોલ તાલુકાના ગંભીરપુરા ગામનો રહેવાસી 34 વર્ષીય વિજય મહેશભાઇ હરીજન બાસ્કા આવેલી ફાર્માસ્યુટિકલ કંપનીમાં નોકરી કરતો હતો. મોડી સાંજે તે બાઇક ઉપર જરોદથી ઘરે જઇ રહ્યો હતો. હાઇવે ઉપર વાહન વ્યવહાર વધુ હોવાથી તે જરોદથી હાલોલ જવાના સર્વિસ રોડ ઉપરથી પસાર થઇ રહ્યો હતો. આ દરમિયાન જરોદથી હાલોલ જવાના સર્વિસ રોડ ઉપર ખેતરમાંથી દોડીને એકાએક ગાય વિજય હરીજનના બાઇક સાથે ભટકાઇ હતી. ગાય બાઇક સાથે ભટકાતા વિજય ઉછળીને સર્વિસ રોડની બાજુમાં આવેલા 10 ફૂટ ઉંડા ખાડામાં પડ્યો હતો. ઘટના સ્થળ નજીક આવેલા નાસ્તાની લારીવાળો દોડીને આવી પહોંચ્યો હતો અને તરત જ 108 એમ્બ્યુલન્સને જાણ કરી હતી.જરોદ પોલીસે સ્થળ પર જઈ અકસ્માતે ગુનો નોંધી વધુ તપાસ હાથ ઘરી છે.

Reporter: News Plus