વડોદરાના લાલબાગ વિસ્તારમાં સવારે સાડા 12 વાગ્યાના અરસામાં એક મહાકાય વૃક્ષ ધરાશાયી થયું હતું જેની નીચે એક રિક્ષા દબાઈ ગઈ હતી.
રિક્ષામાં એક આધેડ પણ બેઠા હતા જેઓની હાલત પણ દયનીય બની હતી. તેઓ વૃક્ષ નીચે દબાઈ જતા સ્થાનિક લોકોએ તેઓને બહાર કાઢવાની મથામણ કરી હતી. લોકોના ટોળા એકત્રિત થઈ ગયા હતા અને ફાયર બ્રિગેડની મદદ લેવામાં આવી હતી. જવાનોએ વૃક્ષ કાપીને રીક્ષા તેમજ દબાયેલી વ્યક્તિનું રેસ્ક્યુ કર્યું હતું. બનાવને પગલે ટ્રાફિક જામ થઈ જતા પોલીસ મદદે આવી હતી.
કલાકોની મહેનત બાદ આધેડને બહાર કાઢવામાં આવ્યા હતા. જો કે તેઓને ગંભીર ઈજાઓ પહોંચી હતી જેના પગલે તેઓને હોસ્પિટલ ખાતે ખસેડવામાં આવ્યા હતા. અત્રે ઉલ્લેખનીય છે કે શહેરમાં અનેક સ્થળોએ ચોમાસાની ઋતુને ધ્યાનમાં રાખીને અનેક સ્થળોએ વૃક્ષો કટિંગ કરવામાં આવે છે. ત્યારે આવા જોખમી વૃક્ષો પણ કાપવામાં આવે તે ઈચ્છનીય છે
Reporter: News Plus
