કચ્છ : ગુજરાતના કચ્છ જિલ્લામાં બોર્ડર સિક્યોરિટી ફોર્સ (BSF) દ્વારા કોરી ક્રીક વિસ્તારમાં મોટી કાર્યવાહી હાથ ધરવામાં આવી હતી.
આ કાર્યવાહીમાં 15 પાકિસ્તાની ઘૂસણખોરોની ધરપકડ કરવામાં આવી હોવાના સમાચાર પ્રાપ્ત થઈ રહ્યા છે.આ ઘટનાએ ભારત-પાકિસ્તાન સરહદની સુરક્ષા અને સંવેદનશીલતા પર ફરી એકવાર પ્રકાશ પાડ્યો છે. BSFની આ ત્વરિત કાર્યવાહીથી સરહદી વિસ્તારોમાં સુરક્ષા વ્યવસ્થા વધુ મજબૂત થઈ છે. સૂત્રોની જાણકારી પ્રમાણે BSFને કોરી ક્રીક વિસ્તારમાં સંદિગ્ધ ગતિવિધિઓની જાણકારી મળી હતી, જેના આધારે તેમણે એક સર્ચ ઓપરેશન હાથ ધર્યું હતું. આ સર્ચ ઓપરેશનમાં તેમણે પાકિસ્તાન નાવ પકડી હતી. ઉલ્લેખનીય છે કે આ નાવ રોકવા જતા નાવ સવાર લોકોએ ભાગવાનો પ્રયાસ કર્યો હતો.પરંતુ 15 ઘૂસણખોરોને ઝડપી લેવામાં આવ્યા છે. આ ઘૂસણખોરો પાસેથી ખોરાક, મોબાઈલ ફોન અને અન્ય જરૂરી સામગ્રી મળી આવી છે.
BSF હાલ તેમની પૂછપરછ કરી રહી છે અને જપ્ત કરેલી સામગ્રીની તપાસ કરવામાં આવી રહી છે.ઉલ્લેખનીય છે કે, કોરી ક્રીક એ ભારત-પાકિસ્તાન સરહદનો અત્યંત સંવેદનશીલ વિસ્તાર છે, જ્યાં દરિયાઈ માર્ગે ઘૂસણખોરી થવાની વધુ શક્યતા રહે છે. આ ઘટના બાદ BSFએ આ વિસ્તારમાં સર્ચ ઓપરેશનને વેગ આપ્યો છે અને વધારાના સુરક્ષા દળો તૈનાત કર્યા છે. નજીકના વિસ્તારોમાં સુરક્ષા વધારી દેવામાં આવી છે જેથી બીજી કોઈ ઘૂસણખોરીનો પ્રયાસ નિષ્ફળ કરી શકાય.BSF અધિકારીઓએ જણાવ્યું કે પકડાયેલા ઘૂસણખોરોની ઓળખ અને તેમના ઇરાદાઓની તપાસ ચાલી રહી છે. સુરક્ષા દળો ખાતરી કરી રહ્યા છે કે સરહદ પર કોઈ સુરક્ષા ચૂક ન થાય અને સ્થાનિક નાગરિકોની સલામતી જળવાઈ રહે.આ ઘટના દર્શાવે છે કે ક્રીક વિસ્તારમાં સતત દેખરેખ અને સતર્કતા અનિવાર્ય છે. BSFની ત્વરિત કાર્યવાહીએ ઘૂસણખોરીની મોટી યોજનાને નિષ્ફળ કરી છે.
Reporter: admin
