વડોદરા: ગુજરાતના વડોદરામાં આવેલી પારુલ યુનિવર્સિટીમાં હોસ્ટેલના ભોજનને લઈને વિદ્યાર્થીઓમાં રોષ જોવા મળ્યો હતો. વિદ્યાર્થીઓના આક્ષેપ મુજબ, હોસ્ટેલમાં પીરસવામાં આવેલા ભોજનમાં કોકરોચ મળી આવ્યો હતો. આ મામલે મોટી સંખ્યામાં વિદ્યાર્થીઓએ વિરોધ પ્રદર્શન કર્યું હતું.

મળતી માહિતી મુજબ, વિદ્યાર્થીઓએ ભોજનમાં કોકરોચ મળ્યાનો દાવો કરતા તેના વીડિયો પણ સોશિયલ મીડિયા પર શેર કર્યા હતા. ઘટનાને પગલે વિદ્યાર્થીઓમાં ભારે નારાજગી જોવા મળી હતી અને તેમણે હોસ્ટેલના ભોજનની ગુણવત્તા તથા સ્વચ્છતા અંગે સવાલો ઉઠાવ્યા હતા.

સ્વતંત્રતા દિવસના અવસર પર વિદ્યાર્થીઓ દ્વારા કરવામાં આવેલા વિરોધ પ્રદર્શનના વીડિયો સોશિયલ મીડિયા પર વાયરલ થયા છે. વિદ્યાર્થીઓએ ભોજનની ગુણવત્તા અને હાઈજિન અંગે યોગ્ય કાર્યવાહી કરવાની માંગ કરી હોવાનું જાણવા મળે છે.

આ સમગ્ર મામલે પારુલ યુનિવર્સિટી મેનેજમેન્ટ તરફથી હજુ સુધી કોઈ સત્તાવાર નિવેદન સામે આવ્યું નથી. યુનિવર્સિટી તરફથી જવાબ મળ્યા બાદ જ ઘટનાની હકીકત અને આગળની કાર્યવાહી અંગે વધુ સ્પષ્ટતા થઈ શકશે.

Reporter: admin