પશ્ચિમ બંગાળમાંથી બબાલ: ગુસ્સે ભરાયેલા ટોળાએ EVM અને VVPAT મશીનોને પાણીમાં ફેંકી દીધા 

TMCની પાર્ટી કાર્યાલયને બીજેપી સમર્થકોએ આગ લગાવી દીધી 

કોલકાતા: લોકસભા ચૂંટણીના છેલ્લા તબક્કાનું આજે મતદાન છે. આજે અંતિમ તબક્કાનું મતદાન, 9 વાગ્યા સુધી 11.31% મતદાન થયું હોવાના અહેવાલ છે.આ પૂર્વે શુક્રવારે પશ્ચિમ બંગાળના જાદવપુર લોકસભા મતવિસ્તારના ભાંગર વિસ્તારમાં હિંસક અથડામણનો મામલો સામે આવ્યો છે. ચૂંટણી પૂર્વે ફાટી નીકળેલી હિંસામાં દસ લોકો ઘાયલ થયા છે. લોકસભા ચૂંટણીના સાતમા અને અંતિમ તબક્કા હેઠળ શનિવારે જાદવપુરમાં મતદાન થઇ રહ્યું છે.

લોકસભા ચૂંટણીના સાતમા તબક્કાનું મતદાન ચાલી રહ્યું છે. આ દરમિયાન પશ્ચિમ બંગાળમાંથી બબાલ થયાના સમાચાર આવી રહ્યા છે. મળતી માહિતી મુજબ, દક્ષિણ 24 પરગણામાં ગુસ્સે ભરાયેલા ટોળાએ EVM અને VVPAT મશીનોને પાણીમાં ફેંકી દીધા છે. છેલ્લા તબક્કામાં પશ્ચિમ બંગાળની 9 બેઠકો પર મતદાન થઈ રહ્યું છે.

મતદાનના સાતમા તબક્કાની શરૂઆતના થોડા સમય પછી, સમાચાર આવ્યા કે પશ્ચિમ બંગાળના દક્ષિણ 24 પરગણાના કુલતાઈમાં બૂથ નંબર 40, 41 પર ભીડે કથિત રીતે EVM અને VVPAT મશીનોને તળાવમાં ફેંકી દીધા હતા. સ્થાનિક લોકો પાસેથી મળેલી માહિતી મુજબ, ટીએમસી સમર્થકો દ્વારા મતદારોને કથિત રીતે ધમકી આપવામાં આવી હતી, જેના કારણે ભીડ ઉશ્કેરાઈ ગઈ હતી અને ઈવીએમને તળાવમાં ફેંકી દીધા હતા

આ વખતે પશ્ચિમ બંગાળે મતદાનની બાબતમાં ખૂબ સારું પ્રદર્શન કર્યું છે. જોકે, પહેલા તબક્કાથી પશ્ચિમ બંગાળમાંથી હિંસાના અહેવાલો આવી રહ્યા છે. પ્રથમ તબક્કાના મતદાનના દિવસે જ તૃણમૂલ કોંગ્રેસે દાવો કર્યો હતો કે અલીપુરદ્વાર તુફનગંજ-2 બ્લોકમાં બારોકોદલી-1 ગ્રામ પંચાયતના હરિરહાટ વિસ્તારમાં TMCની અસ્થાયી પાર્ટી કાર્યાલયને બીજેપી સમર્થકોએ આગ લગાવી દીધી હતી.

Reporter: News Plus