નવી દિલ્હી : કરદાતાઓ નવી આવકવેરા પ્રણાલી તરફ આગળ વધી રહ્યા છે, સરકારની નાની બચત યોજનાઓ હેઠળના સંગ્રહમાં ઘટાડો થયો છે. સરકારી સૂત્રએ જણાવ્યું હતું કે પબ્લિક પ્રોવિડન્ટ ફંડ (PPF) જેવી મોટી નાની બચત યોજનાઓમાં જમા રકમ અને ગ્રાહકોની સંખ્યામાં નોંધપાત્ર ઘટાડો થયો છે.
તેમણે કહ્યું કે આનું મુખ્ય કારણ એ છે કે લગભગ ૭૦% લોકો નવી ટેક્સ સિસ્ટમ તરફ આગળ વધી રહ્યા છે.
ભારતીય રિઝર્વ બેંક (RBI) પાસે ઉપલબ્ધ નવા ડેટા અનુસાર, એપ્રિલ ૨૦૨૩ અને ફેબ્રુઆરી ૨૦૨૪ વચ્ચે PPFમાં જમા કરવામાં આવેલી રકમમાં ઘટાડો થયો છે. ઓક્ટોબર સિવાયના ૧૧ મહિના દરમિયાન લગભગ તમામ મહિનામાં રસીદમાં ઘટાડો થયો છે. એપ્રિલ ૨૦૨૩, સપ્ટેમ્બર ૨૦૨૩ અને જાન્યુઆરી ૨૦૨૪માં સૌથી વધુ ઘટાડો નોંધાયો હતો. એપ્રિલ ૨૦૨૩માં ૫૮.૫૨ ટકા, સપ્ટેમ્બર ૨૦૨૩માં ૪૫.૦૬ ટકા અને જાન્યુઆરી ૨૦૨૪માં ૪૨.૦૬ ટકાનો ઘટાડો થયો હતો.
સૂત્રએ જણાવ્યું હતું કે સુકન્યા સમૃદ્ધિ એકાઉન્ટ અને નેશનલ સેવિંગ્સ સર્ટિફિકેટ જેવી સ્કીમ્સની પ્રાપ્તિમાં પણ ઘટાડો થવાના સંકેતો છે.
વરિષ્ઠ સલાહકાર સુધીર કાપડિયાએ જણાવ્યું હતું કે, ‘મને લાગે છે કે આનું મુખ્ય કારણ એ જ હોઈ શકે છે જે બેંક ડિપોઝિટના કિસ્સામાં જોવા મળ્યું છે એટલે કે ફુગાવાને અનુરૂપ વળતરના વાસ્તવિક દરોમાં ઘટાડો.'
કાપડિયાએ જણાવ્યું હતું કે આ વલણને મ્યુચ્યુઅલ ફંડમાં રોકાણ કરનારા લોકોની સંખ્યામાં જબરદસ્ત વધારા સાથે જોવું જોઈએ. આ દર્શાવે છે કે અર્થતંત્રને વેગ આપવા માટે રોકાણકારોનો વિશ્વાસ વધ્યો છે.
સરકાર તેની રાજકોષીય ખાધને દૂર કરવા માટે રોકડ ઉપાડ, નાની બચત યોજનાઓ હેઠળ સંગ્રહ અને બોન્ડ માર્કેટ બોરોઇંગનો ઉપયોગ કરે છે.
નાની બચત યોજનાઓના ગ્રાહકોની સંખ્યા ૪૦ કરોડથી વધુ છે. આ યોજનાઓમાં રોકાણ પર ગ્રાહકોને કર લાભ મળે છે. તેમાં નેશનલ સેવિંગ્સ સર્ટિફિકેટ (NSC), પબ્લિક પ્રોવિડન્ટ ફંડ (PPF), કિસાન વિકાસ પત્ર (KVP) અને સુકન્યા સમૃદ્ધિ એકાઉન્ટ જેવી ૧૨ યોજનાઓનો સમાવેશ થાય છે. તેમાંથી સુકન્યા સમૃદ્ધિ, PPF અને NSC પર પણ ટેક્સ છૂટ મળે છે.
બેંક ઓફ બરોડાના મુખ્ય અર્થશાસ્ત્રી મદન સબનવીસે કહ્યું, આ સ્વાભાવિક છે, પરંતુ તે સરકારની તરફેણમાં કામ કરશે. NSSF કરતાં આજે બજારમાંથી ઉધાર લેવું સસ્તું છે કારણ કે આ ફંડમાંથી કોઈપણ ઉપાડ સરેરાશ ખર્ચ કરતાં ૫૦ બેસિસ પોઈન્ટ્સ વધુ ખર્ચ કરશે.
Reporter: admin
