વડાપ્રધાન નરેન્દ્ર મોદી બુધવારથી ઓસ્ટ્રેલિયાના ત્રણ દિવસીય સત્તાવાર પ્રવાસે રવાના થશે. ઓસ્ટ્રેલિયાના વડાપ્રધાન એન્થની અલ્બાનીઝના આમંત્રણ પર તેઓ 8થી 10 જુલાઈ દરમિયાન મેલબર્નમાં યોજાનારી વાર્ષિક લીડર્સ સમિટમાં ભાગ લેશે. આ પ્રવાસ દરમિયાન ભારત અને ઓસ્ટ્રેલિયા વચ્ચેની વ્યાપક વ્યૂહાત્મક ભાગીદારીને વધુ મજબૂત બનાવવા માટે અનેક મહત્વપૂર્ણ બેઠકો અને કાર્યક્રમો યોજાશે.
પ્રવાસ દરમિયાન વડાપ્રધાન મોદી તેમના ઓસ્ટ્રેલિયન સમકક્ષ એન્થની અલ્બાનીઝ સાથે દ્વિપક્ષીય બેઠક કરશે. બંને નેતાઓ સંરક્ષણ, વેપાર, રોકાણ, શિક્ષણ, ટેકનોલોજી, સ્વચ્છ ઊર્જા તેમજ ઈન્ડો-પેસિફિક ક્ષેત્રમાં સહકાર જેવા મહત્વપૂર્ણ મુદ્દાઓ પર ચર્ચા કરશે. ઉપરાંત, વડાપ્રધાન મોદી ઓસ્ટ્રેલિયાના ગવર્નર જનરલ સેમ મોસ્ટિન સાથે પણ મુલાકાત કરશે.
વડાપ્રધાન મોદી ભારત-ઓસ્ટ્રેલિયા સીઈઓ ફોરમને પણ સંબોધિત કરશે, જેમાં બંને દેશોના અગ્રણી ઉદ્યોગપતિઓ અને વેપારજગતના પ્રતિનિધિઓ હાજર રહેશે. ઉપરાંત, તેઓ મેલબર્નમાં ભારતીય મૂળના લોકોના વિશાળ સમારોહને પણ સંબોધિત કરશે. પ્રવાસી ભારતીય સમુદાયને બંને દેશો વચ્ચેના સંબંધોની મહત્વપૂર્ણ કડી માનવામાં આવે છે.
વડાપ્રધાન મોદીના પ્રવાસ પૂર્વે ઓસ્ટ્રેલિયાના વડાપ્રધાન એન્થની અલ્બાનીઝે ભારતને ઓસ્ટ્રેલિયાનો મહત્વપૂર્ણ વ્યૂહાત્મક અને આર્થિક ભાગીદાર ગણાવ્યો હતો. તેમણે જણાવ્યું હતું કે ભારત વિશ્વની સૌથી ઝડપથી વિકસતી અર્થવ્યવસ્થાઓમાંનું એક છે અને બંને દેશોની ભાગીદારી ઈન્ડો-પેસિફિક ક્ષેત્રમાં શાંતિ, સ્થિરતા અને સમૃદ્ધિને પ્રોત્સાહન આપવામાં મહત્વપૂર્ણ ભૂમિકા ભજવી રહી છે.
અલ્બાનીઝે વડાપ્રધાન મોદીના સ્વાગતને સન્માનની બાબત ગણાવતા કહ્યું કે ભારત અને ઓસ્ટ્રેલિયા વચ્ચેની વ્યાપક વ્યૂહાત્મક ભાગીદારી સતત વધુ મજબૂત બની રહી છે. તેમણે આર્થિક, સાંસ્કૃતિક અને લોકો વચ્ચેના સંબંધોને વધુ ગાઢ બનાવવા માટે બંને દેશોની પ્રતિબદ્ધતા પણ વ્યક્ત કરી.
Reporter: admin
