અમેરિકા ફરી ગોળીબારની ઘટના: ફેસ્ટિવલમાં અફરાતફરી

અમેરિકાના ઓહાયો રાજ્યના ટોલેડો શહેરમાં આયોજિત એક ફેસ્ટિવલ દરમિયાન ગોળીબારની ઘટના સામે આવી છે. સ્થાનિક સમય મુજબ સાંજે લગભગ 5:37 વાગ્યે “ઓલ્ડ વેસ્ટ એન્ડ ફેસ્ટિવલ” નજીક અચાનક ગોળીબાર થતાં સમગ્ર વિસ્તારમાં અફરાતફરી મચી ગઈ હતી.પોલીસના જણાવ્યા અનુસાર ઘટનામાં અનેક લોકો ઘાયલ થયા છે, જેમાં પ્રાથમિક માહિતી મુજબ ઓછામાં ઓછા 12 લોકોને ગોળી વાગી છે. ઘાયલ તમામ લોકોને તાત્કાલિક હોસ્પિટલમાં સારવાર માટે ખસેડવામાં આવ્યા છે, જેમાં બે લોકોની હાલત ગંભીર હોવાનું પણ જણાવાયું છે.ટોલેડો પોલીસ ઘટનામાં સામેલ એક અથવા વધુ શંકાસ્પદ આરોપીઓની શોધખોળ કરી રહી છે. પોલીસની તપાસ ડેલેવર એવન્યુ અને રોબિનવુડ એવન્યુ આસપાસ કેન્દ્રિત કરવામાં આવી છે.

સ્થાનિક મેયર વેડ કેપ્સજુકિવિઝે જણાવ્યું કે ફેસ્ટિવલ જેવા જાહેર કાર્યક્રમો પરિવારો માટે સુરક્ષિત હોવા જોઈએ, પરંતુ આ ઘટનાએ શહેરને હચમચાવી દીધું છે. તેમણે ઘાયલો માટે પ્રાર્થના વ્યક્ત કરી અને પોલીસ ઝડપથી આરોપીઓને પકડી લેશે તેવી આશા વ્યક્ત કરી.સોશિયલ મીડિયા પર વાયરલ થયેલા વીડિયોમાં લોકો જીવ બચાવવા દોડતા અને ગોળીબાર વચ્ચે અફરાતફરીનો માહોલ જોવા મળ્યો છે. ઓહાયોના ગવર્નર માઈક ડિવાઈને પણ ઘટનાને લઈને ચિંતા વ્યક્ત કરી છે અને કાયદો-વ્યવસ્થા જાળવવા કડક પગલાં લેવાની વાત કરી છે.‘ઓલ્ડ વેસ્ટ એન્ડ ફેસ્ટિવલ’ ઓહાયોના સૌથી મોટા સાંસ્કૃતિક ઉત્સવોમાંનો એક માનવામાં આવે છે, જેમાં લાઈવ મ્યુઝિક, ફૂડ માર્કેટ અને વિવિધ કાર્યક્રમો યોજાય છે.

Reporter: admin