ચિકાગો : અમેરિકામાં ભારતીય વિદ્યાર્થીઓના ગુમ થવા અથવા હત્યાની ઘટનાઓ સતત વધી રહી છે. જેમાં ફરી એકવાર અમેરિકાના શિકાગોથી એક ભારતીય વિદ્યાર્થી ગુમ થયો છે. વિદ્યાર્થીની ઓળખ રૂપેશ ચંદ્ર ચિંતકિંડી તરીકે થઈ છે.
શિકાગોમાં ભારતીય કોન્સ્યુલેટ જનરલે કહ્યું છે કે તે પોલીસ અને અમેરિકામાં રહેતા ભારતીયોના સંપર્કમાં છે. કોન્સ્યુલેટ જનરલે સોશિયલ મીડિયા પર શેર કરેલી પોસ્ટમાં લખ્યું છે કે 'કોન્સ્યુલેટ જનરલ ભારતીય વિદ્યાર્થી રૂપેશ ચંદ્રના ગુમ થવાના સમાચાર સાંભળીને ખૂબ જ ચિંતિત છે. એમ્બેસી ભારતીય સમુદાય અને પોલીસ સાથે સતત સંપર્કમાં છે અને આશા છે કે રૂપેશને ટૂંક સમયમાં શોધી કાઢવામાં આવશે.'
શિકાગો પોલીસે લોકોને અપીલ કરી છે કે જો તેમને રૂપેશ વિશે કોઈ માહિતી મળે તો પોલીસને જણાવે. શિકાગોના એન શેરિડન રોડના 4300 બ્લોકમાંથી રૂપેશ 2 મેથી ગુમ છે. આ પહેલા માર્ચમાં પણ એક ભારતીય વિદ્યાર્થી ગુમ થયો હતો, જેનો મૃતદેહ એપ્રિલમાં મળી આવ્યો હતો. હૈદરાબાદના રહેવાસી મોહમ્મદ અબ્દુલ અરાફાતનો મૃતદેહ ક્લીવલેન્ડ, ઓહાયોમાંથી મળી આવ્યો હતો. અરાફાત ક્લેવલેન્ડ યુનિવર્સિટીમાંથી આઈટીમાં માસ્ટર ડિગ્રી મેળવવા માટે અમેરિકા ગયો હતો.
Reporter: News Plus
