વૈશ્વિક સ્તરે ચાલી રહેલા અમેરિકા-ઈરાન તણાવ અને કોમોડિટી બજારમાં ઊભી થયેલી અનિશ્ચિતતાની વચ્ચે સોના અને ચાંદીના ભાવમાં ફરી તેજી જોવા મળી છે. સલામત રોકાણ તરીકે સોનાની માંગ વધતાં આંતરરાષ્ટ્રીય બજારમાં કિંમતી ધાતુઓના દરોમાં ઉછાળો નોંધાયો છે, જેનો સીધો પ્રભાવ દેશના સરાફા બજાર પર પણ જોવા મળી રહ્યો છે. છેલ્લા કેટલાક દિવસોથી ચાલતી ઊથલપાથલ બાદ હવે સોના-ચાંદીના ભાવમાં મજબૂત રિકવરી નોંધાઈ છે.
આંતરરાષ્ટ્રીય બજારમાં હાજર સોનાના ભાવમાં એક ટકાથી વધુનો ઉછાળો આવ્યો છે, જ્યારે ચાંદીમાં પણ નોંધપાત્ર તેજી જોવા મળી છે. બજાર નિષ્ણાતોના જણાવ્યા મુજબ, નીચલા સ્તરે થયેલી ખરીદી અને શોર્ટ કવરિંગના કારણે કિંમતોમાં ફરી ચમક આવી છે. વૈશ્વિક મોંઘવારી અને વ્યાજદરો અંગેની ચિંતામાં થોડી નરમાઈ આવતા રોકાણકારો ફરીથી સોના તરફ વળ્યા છે. ચાંદીના ભાવમાં પણ મજબૂતી આવતાં રોકાણકારો અને સામાન્ય ખરીદદારો બંનેની નજર હવે આગામી દિવસોના બજાર વલણ પર ટકેલી છે.
દેશના મોટા શહેરોમાં પણ સોનાના નવા દરોમાં વધારો નોંધાયો છે. દિલ્હી ખાતે 24 કેરેટ સોનાનો ભાવ રૂ. 14,622 પ્રતિ ગ્રામ સુધી પહોંચ્યો છે, જ્યારે 22 કેરેટ સોનું રૂ. 13,404 અને 18 કેરેટ સોનું રૂ. 10,970 પ્રતિ ગ્રામ પર નોંધાયું છે. મુંબઈ અને કોલકાતામાં 24 કેરેટ સોનાનો ભાવ રૂ. 14,607 પ્રતિ ગ્રામ રહ્યો છે. દક્ષિણ ભારતના શહેરોમાં, ખાસ કરીને ચેન્નઈમાં, સોનાના ભાવ અન્ય શહેરોની સરખામણીએ વધુ રહ્યા છે, જ્યાં 24 કેરેટ સોનાનો દર રૂ. 14,836 પ્રતિ ગ્રામ નોંધાયો છે.
ચાંદીના ભાવમાં પણ મજબૂતી જોવા મળી રહી છે. બજારના વેપારીઓનું માનવું છે કે જો આંતરરાષ્ટ્રીય સ્તરે તણાવ યથાવત રહેશે તો આવનારા દિવસોમાં સોના-ચાંદીના ભાવમાં વધુ હલચલ જોવા મળી શકે છે. તેથી ખરીદદારો અને રોકાણકારો માટે હાલનો સમય સાવચેત રહેવાનો ગણાય છે.
Reporter: admin
