લખનૌ: ઉત્તર પ્રદેશની રાજધાની લખનૌના અલીગંજ વિસ્તારમાં સોમવારે બપોરે આવેલા એક કોચિંગ સેન્ટરમાં ભીષણ આગ લાગતા અફરાતફરી મચી ગઈ હતી. ત્રણ માળની કોમર્શિયલ બિલ્ડિંગમાં લાગેલી આગ બાદ અંદર ફસાયેલા વિદ્યાર્થીઓએ જીવ બચાવવા માટે બારીઓમાંથી કૂદકો માર્યો હતો, જ્યારે કેટલાક વિદ્યાર્થીઓ બહારના વાયર પકડીને નીચે ઉતરવાનો પ્રયાસ કરતા જોવા મળ્યા હતા. ઘટનામાં અનેક વિદ્યાર્થીઓને ઇજા પહોંચી હોવાનું સામે આવ્યું છે.

પ્રાથમિક માહિતી મુજબ, અલીગંજ વિસ્તારની એક કોમર્શિયલ બિલ્ડિંગમાં આગ ફાટી નીકળી હતી, જ્યાં નીચલા માળે દુકાનો અને ઉપરના માળે કોચિંગ ક્લાસીસ ચાલી રહ્યા હતા. આગ ઝડપથી ફેલાતાં કોચિંગ સેન્ટરમાં હાજર વિદ્યાર્થીઓમાં ચીસો અને ભાગદોડ મચી ગઈ હતી. ધુમાડો અને જ્વાળાઓ વચ્ચે બહાર નીકળવાનો માર્ગ અવરોધિત થતાં ઘણા વિદ્યાર્થીઓએ બચવા માટે બારીઓ અને ગેલેરીનો સહારો લીધો હતો.

સ્થાનિક લોકો અને પોલીસના જણાવ્યા અનુસાર, કેટલાક વિદ્યાર્થીઓએ બીજા માળેથી નીચે કૂદકો માર્યા હતા, જેના કારણે તેમને હાથ-પગ અને શરીરના અન્ય ભાગોમાં ઇજાઓ પહોંચી છે. ઘટનાની જાણ થતા ફાયર વિભાગની ટીમો તાત્કાલિક સ્થળ પર પહોંચી હતી અને આગ પર કાબૂ મેળવવા માટે 14 ફાયર ટેન્ડર તૈનાત કરવામાં આવ્યા હતા. બચાવ કામગીરી દરમિયાન બિલ્ડિંગમાં ફસાયેલા લોકોને સુરક્ષિત બહાર કાઢવાના પ્રયાસો હાથ ધરાયા હતા.

આ ઘટનાની ગંભીરતા જોતા ઉત્તર પ્રદેશના મુખ્યમંત્રી યોગી આદિત્યનાથે અધિકારીઓને તાત્કાલિક રાહત અને બચાવ કામગીરી તેજ કરવાની સૂચના આપી છે. સાથે જ ઇજાગ્રસ્તોને યોગ્ય સારવાર આપવાની અને આગ લાગવાના કારણોની સઘન તપાસ કરવાની પણ સૂચના આપવામાં આવી છે. પ્રાથમિક તબક્કે શોર્ટ સર્કિટ સહિતના કારણો પર શંકા વ્યક્ત કરવામાં આવી રહી છે, જોકે સત્તાવાર કારણ તપાસ બાદ જ સ્પષ્ટ થશે.

આ બનાવે એકવાર ફરી કોચિંગ સેન્ટરો અને કોમર્શિયલ બિલ્ડિંગોમાં ફાયર સેફ્ટીના અભાવનો મુદ્દો ઉછાળી દીધો છે. મોટી સંખ્યામાં વિદ્યાર્થીઓ ભેગા થતા આવા કેન્દ્રોમાં પૂરતી ઇમર્જન્સી એક્ઝિટ, આગ બુઝાવવાના સાધનો અને સુરક્ષા ધોરણોનું પાલન થાય છે કે નહીં, તે અંગે સવાલો ઊભા થયા છે. હવે તપાસમાં આગ માટે જવાબદાર બેદરકારી સામે આવે છે કે નહીં, તેના પર સૌની નજર છે.

Reporter: admin