ગટરનો ગંદવાડ, તંત્રની નિષ્ક્રિયતા અને મહામારીનો ખતરો

સ્માર્ટ સિટી તરીકે કોર્પોરેશનના શાસકો જે દાવા કરે છે તે વડોદરા શહેર આજે વાસ્તવિકતામાં ગટરના ગંદા પાણીમાં ગળાડૂબ છે. શહેરના પરશુરામ ભઠ્ઠા વિસ્તારમાં છેલ્લા કેટલાય સમયથી ઊભરાતી ગટરની સમસ્યાએ સ્થાનિક રહીશોનું જીવન નરક સમાન બનાવી દીધું છે. વહીવટી તંત્રની ગુનાહિત નિષ્ક્રિયતા અને ઘોર બેદરકારીના કારણે આખો વિસ્તાર હવે માત્ર મનુષ્યો માટે જ નહીં, પણ જીવલેણ રોગોના ભરડામાં આવતો વિસ્તાર બની ગયો છે. વારંવારની રજૂઆતો છતાં તંત્રના બહેરા કાને એકપણ ભલામણ કે ફરિયાદ પહોંચતી નથી. આખરે નાગરિકો ક્યાં જાય? શું વડોદરાના આ કરદાતા નાગરિકોનું સ્વાસ્થ્ય અને જીવન તંત્ર માટે કોઈ મૂલ્ય નથી ધરાવતું?પરશુરામ ભઠ્ઠાની હાલત એ છે કે આખી સાંકડી ગલી પણ ગટરના દુર્ગંધયુક્ત, મલિન પાણીથી ભરાઈ ગઈ છે. લોકો ગંદા પાણીમાંથી ચાલવા મજબૂર છે. આ કાળું અને ડહોળું પાણી માત્ર રસ્તાઓ પર જ નથી, પરંતુ સ્થાનિકોના ઘરના દરવાજા સુધી પહોંચી ગયું છે, જે ગમે ત્યારે મકાનોની અંદર ઘૂસીને ઘરવખરીને નુકસાન પહોંચાડી શકે છે. 

આખા વિસ્તારને ગટરના તળાવમાં ફેરવી નાખવામાં આવ્યો છે. ગંદા પાણીથી ફેલાતી અસહ્ય દુર્ગંધને કારણે શ્વાસ લેવો પણ મુશ્કેલ છે.પરશુરામ ભઠ્ઠાના રહેવાસીઓ આ નરક જેવી પરિસ્થિતિ સામે છેલ્લા ઘણા મહિનાઓથી ઝઝૂમી રહ્યા છે. સ્થાનિક રહીશોએ અનેકવાર મહાનગરપાલિકાના ઝોનલ વોર્ડ ઓફિસથી લઈને મ્યુનિસિપલ કમિશનર સુધી લેખિત અને મૌખિક રજૂઆતો કરી છે. રસ્તાઓ પર ગટરના પાણી ભરાઈ જવાના કારણે બાળકો શાળાએ જઈ શકતા નથી, વૃદ્ધો ઘરની બહાર નીકળી શકતા નથી અને વેપારીઓનો ધંધો ચોપટ થઈ ગયો છે. તંત્ર દ્વારા માત્ર “કામગીરી ચાલુ છે” જેવા પોકળ વાયદા જ આપવામાં આવે છે.સૌથી વધુ ચિંતાજનક બાબત રોગચાળાની ભયંકર દહેશત છે. આ ઊભરાતી ગટરના ગંદા અને બંધિયાર પાણીમાં ડેન્ગ્યુ, મલેરિયા, કોલેરા, ટાઈફોઈડ જેવા અનેક જીવલેણ રોગોના મચ્છરો અને બેક્ટેરિયા પૂરજોશમાં ફાલીફૂલી રહ્યા છે. જો સમયસર ગટરની આ લાઇન ઠીક કરવામાં નહીં આવે તો આવનારા દિવસોમાં પરશુરામ ભઠ્ઠા વિસ્તારમાંથી ભયંકર મહામારીના કેસો સામે આવી શકે છે.

Reporter: admin