આંતરરાષ્ટ્રીય બજારમાં કાચા તેલ (Crude Oil)ના ભાવમાં સતત ચોથા સપ્તાહે ઘટાડાના સંકેતો જોવા મળી રહ્યા છે. અમેરિકા અને ઈરાન વચ્ચે ચાલી રહેલી રાજદ્વારી વાતચીતમાં સકારાત્મક પ્રગતિ તેમજ હોર્મુઝ જળમાર્ગ (Hormuz Strait)માં જહાજોની અવરજવર ફરી સામાન્ય બનતા વૈશ્વિક બજારોમાં રાહતનો માહોલ જોવા મળી રહ્યો છે.
નિષ્ણાતોના જણાવ્યા અનુસાર, મધ્ય પૂર્વમાં તણાવ ઘટતા કાચા તેલના પુરવઠાને લઈને રહેલી ચિંતાઓમાં ઘટાડો થયો છે. જેના કારણે આંતરરાષ્ટ્રીય બજારમાં ક્રૂડ ઓઈલના ભાવ પર દબાણ જોવા મળી રહ્યું છે અને રોકાણકારોમાં પણ વિશ્વાસ વધ્યો છે.
કાચા તેલના ભાવમાં સતત ઘટાડો ભારત જેવા તેલ આયાત કરતા દેશો માટે સારા સમાચાર માનવામાં આવી રહ્યા છે. જો આ વલણ યથાવત રહેશે તો પેટ્રોલ-ડીઝલના ખર્ચમાં રાહત મળવાની સાથે મોંઘવારી પર પણ સકારાત્મક અસર જોવા મળી શકે છે.
આર્થિક નિષ્ણાતોનું માનવું છે કે વૈશ્વિક સ્તરે કાચા તેલના ભાવમાં નરમાઈ રહેતા ઊર્જા આયાતનો ખર્ચ ઘટશે, જે ભારત સહિત અનેક દેશોની અર્થવ્યવસ્થા માટે ફાયદાકારક સાબિત થઈ શકે છે.
Reporter: admin
