રાષ્ટ્રીય સુરક્ષા સલાહકાર (NSA) અજિત ડોભાલની અધ્યક્ષતામાં નવી દિલ્હીમાં BIMSTECના સભ્ય દેશોના સુરક્ષા વડાઓની ઉચ્ચસ્તરીય બેઠક યોજાઈ હતી. બેઠકમાં પ્રાદેશિક સુરક્ષા, આતંકવાદ વિરોધી સહકાર, સાયબર સુરક્ષા, સરહદ પારના ગુનાઓ, દરિયાઈ સુરક્ષા તેમજ ગુપ્તચર માહિતીના આદાન-પ્રદાન સહિતના મહત્વપૂર્ણ મુદ્દાઓ પર વિસ્તૃત ચર્ચા કરવામાં આવી.
બેઠક દરમિયાન સભ્ય દેશોએ આતંકવાદને મળતા નાણાકીય સહયોગ પર રોક લગાવવા, કટ્ટરપંથી પ્રવૃત્તિઓ સામે અસરકારક કાર્યવાહી કરવા અને ઉભરતા સુરક્ષા પડકારોનો સંયુક્ત રીતે સામનો કરવા માટે સહકાર વધારવા પર સહમતિ વ્યક્ત કરી. સુરક્ષા એજન્સીઓ વચ્ચે માહિતીના ઝડપી આદાન-પ્રદાન અને પરસ્પર સમન્વયને વધુ મજબૂત બનાવવા પર પણ ભાર મૂકવામાં આવ્યો.
NSA અજિત ડોભાલે જણાવ્યું કે પ્રાદેશિક શાંતિ, સ્થિરતા અને આર્થિક વિકાસ માટે BIMSTEC દેશો વચ્ચે મજબૂત સુરક્ષા સહયોગ અત્યંત જરૂરી છે. તેમણે આતંકવાદ પ્રત્યે 'ઝીરો ટોલરન્સ'ની નીતિ અપનાવવા અને તમામ સુરક્ષા પડકારો સામે સંયુક્ત પ્રયાસો કરવાની જરૂરિયાત પર ભાર મૂક્યો.
BIMSTECમાં ભારત, બાંગ્લાદેશ, ભૂટાન, નેપાળ, શ્રીલંકા, મ્યાનમાર અને થાઈલેન્ડ સભ્ય દેશોનો સમાવેશ થાય છે. આ બેઠકને હિંદ મહાસાગર અને બંગાળની ખાડી વિસ્તારમાં પ્રાદેશિક સુરક્ષા સહકારને વધુ મજબૂત બનાવવાના મહત્વપૂર્ણ પગલા તરીકે જોવામાં આવી રહી છે.
Reporter: admin
