એશિયન શેરબજારોમાં સોમવારે મિશ્ર વલણ જોવા મળ્યું હતું. અમેરિકા અને ઈરાન વચ્ચે ચાલી રહેલી વાટાઘાટોમાં પ્રગતિના સંકેતો મળતાં વૈશ્વિક બજારોમાં સાવચેતીભર્યો આશાવાદ જોવા મળ્યો હતો. આ અસર હેઠળ કાચા તેલના ભાવમાં નરમાઈ નોંધાઈ હતી, જ્યારે અમેરિકન ફ્યુચર્સ દબાણમાં રહ્યા હતા. બીજી તરફ, જાપાન અને દક્ષિણ કોરિયાના બજારોમાં AI સંબંધિત શેરોના ટેકાથી તેજી જોવા મળી હતી.

જાપાનનો નિક્કી 225 ઇન્ડેક્સ 1.6 ટકાના ઉછાળા સાથે 72,364.82 પર પહોંચ્યો હતો. દિવસ દરમિયાન તેણે 72,831.73નું સર્વકાલીન ઉચ્ચ સ્તર પણ સ્પર્શ્યું હતું. વૈશ્વિક સ્તરે આર્ટિફિશિયલ ઇન્ટેલિજન્સ પ્રત્યે વધી રહેલા ઉત્સાહને કારણે ટેક્નોલોજી શેરોમાં જોરદાર ખરીદી થઈ હતી. AI ક્ષેત્રમાં રોકાણ માટે જાણીતી સોફ્ટબેન્ક ગ્રુપના શેરમાં 2.4 ટકાનો વધારો નોંધાયો હતો, જ્યારે ચિપ સાધનો બનાવતી ટોક્યો ઇલેક્ટ્રોન 2.3 ટકા ચઢી હતી.

દક્ષિણ કોરિયાનો કોસ્પી ઇન્ડેક્સ 0.4 ટકા વધી 9,084.37 પર પહોંચ્યો હતો. AI થીમવાળા શેરોમાં ખરીદીના કારણે બજાર મજબૂત રહ્યું હતું. મેમરી ચિપ નિર્માતા SK Hynixના શેરમાં 4.7 ટકાનો ઉછાળો નોંધાયો હતો. બજાર નિષ્ણાતોના જણાવ્યા મુજબ ટેક્નોલોજી અને AI થીમ હાલ એશિયન બજારોને મજબૂત ટેકો આપી રહ્યા છે, જોકે મધ્યપૂર્વની અનિશ્ચિતતા રોકાણકારોને સાવચેત પણ રાખી રહી છે.

બીજી તરફ હોંગકોંગનો હેંગ સેંગ ઇન્ડેક્સ 1 ટકા ઘટીને 23,690.86 પર આવ્યો હતો, જ્યારે શાંઘાઈ કોમ્પોઝિટ 0.2 ટકા વધીને 4,098.01 પર પહોંચ્યો હતો. ઓસ્ટ્રેલિયાનો S&P/ASX 200 0.1 ટકા ઘટીને 8,822.80 પર રહ્યો હતો. તાઈવાનનો તાઈએક્સ 2.8 ટકા ચઢ્યો હતો, જ્યારે ભારતનો સેન્સેક્સ 0.6 ટકા મજબૂત રહ્યો હતો.

તેલ બજારમાં અમેરિકાઅને ઈરાન વચ્ચેના તણાવમાં રાહતની આશાએ ઘટાડો જોવા મળ્યો હતો. આંતરરાષ્ટ્રીય ધોરણ ગણાતો બ્રેન્ટ ક્રૂડ 1.4 ટકા ઘટીને 79.42 ડોલર પ્રતિ બેરલ પર ટ્રેડ થતો હતો. યુદ્ધ શરૂ થાય તે પહેલાં તેલનો ભાવ આશરે 70 ડોલર પ્રતિ બેરલ હતો. સ્વિટ્ઝરલેન્ડમાં અમેરિકા અને ઈરાન વચ્ચે ઉચ્ચસ્તરીય વાટાઘાટો પૂર્ણ થઈ હતી અને હવે ટેકનિકલ સ્તરની ચર્ચાઓ સપ્તાહભર ચાલુ રહેવાની છે. ઈરાને હોર્મુઝ જળમાર્ગ ફરી બંધ હોવાનો દાવો કર્યો હતો, પરંતુ અમેરિકાએ ત્યાં જહાજોની અવરજવર ચાલુ હોવાનું જણાવ્યું હતું.

Reporter: admin