ઉત્તર પ્રદેશના વારાણસી શહેરમાં દેશનો પ્રથમ અર્બન પબ્લિક ટ્રાન્સપોર્ટ રોપવે અંતિમ તબક્કામાં પહોંચી ગયો છે. અંદાજે ₹800 કરોડના ખર્ચે તૈયાર થયેલો આ મહત્ત્વાકાંક્ષી પ્રોજેક્ટ દેવ દીપાવલી-2026 દરમિયાન, એટલે કે 24 નવેમ્બરની આસપાસ, જનતા માટે ખુલ્લો મુકાય તેવી શક્યતા છે.
3.85 કિલોમીટર લાંબો આ રોપવે વારાણસી કૅન્ટ રેલવે સ્ટેશનથી ગોદોલિયા ચોક સુધી મુસાફરોને માત્ર 16 મિનિટમાં પહોંચાડશે. હાલમાં ટ્રાફિકના કારણે આ જ મુસાફરીમાં 45 મિનિટ કે તેથી વધુ સમય લાગે છે. આ પ્રોજેક્ટ શરૂ થયા બાદ વારાણસી દેશનું પ્રથમ અને વિશ્વનું ત્રીજું શહેર બનશે, જ્યાં રોપવેનો ઉપયોગ નિયમિત શહેરી જાહેર પરિવહન તરીકે કરવામાં આવશે.
રોપવે શહેરના સૌથી વ્યસ્ત અને ગીચ વિસ્તારોમાંથી પસાર થશે. વારાણસી વિકાસ પ્રાધિકરણના જણાવ્યા અનુસાર, આ સેવા શરૂ થતાં શહેરના મુખ્ય માર્ગો પર ટ્રાફિકનું દબાણ લગભગ 40 ટકા સુધી ઘટશે. બંને દિશામાં મળીને પ્રતિ કલાક આશરે 6 હજાર મુસાફરો મુસાફરી કરી શકશે, જ્યારે દરરોજ લગભગ 96 હજાર લોકો આ સુવિધાનો લાભ લઈ શકશે.
આ પ્રોજેક્ટ હેઠળ કુલ પાંચ સ્ટેશન બનાવવામાં આવ્યા છે. જેમાં વારાણસી કૅન્ટ રેલવે સ્ટેશન, કાશી વિદ્યાપીઠ, રથયાત્રા, ગિરજાઘર અને અંતિમ ગોદોલિયા ચોકનો સમાવેશ થાય છે. ગોદોલિયા સ્ટેશનથી કાશી વિશ્વનાથ મંદિર અને દશાશ્વમેધ ઘાટ માત્ર 400 મીટરના અંતરે હોવાથી શ્રદ્ધાળુઓ અને પ્રવાસીઓને મોટી રાહત મળશે.
રોપવેનું ભાડું સામાન્ય નાગરિકોને પરવડે તે રીતે નક્કી કરવામાં આવ્યું છે. મુસાફરીનું લઘુત્તમ ભાડું માત્ર ₹10 રાખવામાં આવ્યું છે, જ્યારે કૅન્ટથી ગોદોલિયા સુધીની સંપૂર્ણ મુસાફરી માટે મુસાફરોને માત્ર ₹50 ચૂકવવાના રહેશે. એર કન્ડીશન્ડ કેબિનમાં ઝડપી, આરામદાયક અને ટ્રાફિકમુક્ત મુસાફરીનો લાભ મળતા સમય અને ખર્ચ બંનેમાં નોંધપાત્ર બચત થશે.
Reporter: admin
