શ્રીલંકા-એ સામે ટ્રાઈ સિરીઝના ફાઇનલ મુકાબલામાં યુવા બેટ્સમેન વૈભવ સૂર્યવંશીએ વિસ્ફોટક બેટિંગ કરીને ટીકાકારોને કરારો જવાબ આપ્યો હતો. દાંબુલ્લાના રંગિરી દાંબુલ્લા ઇન્ટરનેશનલ સ્ટેડિયમમાં રમાયેલા ખિતાબી મુકાબલામાં વૈભવે માત્ર 29 બોલમાં 94 રનની તોફાની ઇનિંગ્સ રમી હતી. તેની આ ધમાકેદાર પારીના આધારે ઈન્ડિયા-એએ શ્રીલંકા-એને 66 રને હરાવી ટ્રાઈ સિરીઝનો ખિતાબ પોતાના નામે કર્યો હતો. વૈભવે પોતાની ઇનિંગ્સ દરમિયાન 10 ચોગ્ગા અને 8 છગ્ગા ફટકાર્યા હતા, જ્યારે તેની સ્ટ્રાઈક રેટ 324.14 રહી હતી.
આ મેચમાં વૈભવ સૂર્યવંશીએ ફક્ત ઝડપી રન જ નહોતા બનાવ્યા, પરંતુ એક મોટો રેકોર્ડ પણ પોતાના નામે કર્યો હતો. તેણે માત્ર 11 બોલમાં અડધી સદી ફટકારીને લિસ્ટ-એ ક્રિકેટમાં સૌથી ઝડપી ફિફ્ટી નોંધાવવાનો કારનામો કર્યો હતો. ફાઇનલ જેવી મોટી મેચમાં આવી ઇનિંગ્સ રમીને વૈભવે ફરી એકવાર પોતાને મોટા મંચનો ખેલાડી સાબિત કર્યો છે.
મેચ બાદ વૈભવ સૂર્યવંશીએ ટીકાકારોને આડકતરી રીતે જવાબ આપતા જણાવ્યું હતું કે, “કદાચ લોકોને ખબર નહીં હોય…” અને સાથે એ પણ સંકેત આપ્યો કે તે 50 ઓવરના ફોર્મેટમાં પણ સારી રીતે રમવાની ક્ષમતા ધરાવે છે. તેની આ ટિપ્પણીને તેની તોફાની ઇનિંગ્સ સાથે જોડીને જોવામાં આવી રહી છે. અગાઉ તેની બેટિંગ શૈલી અને પ્રદર્શનને લઈને સવાલો ઉઠાવવામાં આવ્યા હતા, પરંતુ ફાઇનલમાં તેણે આક્રમક રમત દ્વારા તમામ ચર્ચાઓને વિરામ આપ્યો હતો.
ઉલ્લેખનીય છે કે, શ્રીલંકા-એ સામેની આ સિરીઝ દરમિયાન વૈભવ સૂર્યવંશી ચર્ચાના કેન્દ્રમાં રહ્યો હતો. અગાઉના મુકાબલામાં શ્રીલંકન ખેલાડીઓ સાથે થયેલા વિવાદ બાદ ફાઇનલને લઈ પણ ઉત્સુકતા હતી. જોકે, ખિતાબી મુકાબલામાં વૈભવે વિવાદનો જવાબ બેટથી આપ્યો અને ભારત-એને ચેમ્પિયન બનાવવામાં સૌથી મોટી ભૂમિકા ભજવી હતી. તેની આ પારી હવે યુવા ક્રિકેટરના આત્મવિશ્વાસ અને ક્ષમતાનો મજબૂત પુરાવો માનવામાં આવી રહી છે.
Reporter: admin
