NEET પેપર લીકના વિરોધમાં જંતર-મંતર સહિત દેશભરમાં થયેલા વિદ્યાર્થી પ્રદર્શન દરમિયાન નોંધાયેલી એફઆઈઆર અને પોલીસ કાર્યવાહી સંબંધિત અરજીઓ પર સોમવારે સુપ્રીમ કોર્ટમાં સુનાવણી થઈ હતી. મુખ્ય ન્યાયાધીશ સૂર્યકાંત, ન્યાયમૂર્તિ જોયમાલ્યા બાગચી અને ન્યાયમૂર્તિ વી. મોહનાની ખંડપીઠે કેસની નિષ્પક્ષ અને સ્વતંત્ર તપાસ માટે હાઈ-પાવર્ડ કમિટી રચવાના મુદ્દે વિચારણા કરવાની વાત કરી હતી. સરકાર અને અરજદારો બંનેએ આ પ્રસ્તાવને સમર્થન આપ્યું હતું.
સુનાવણી દરમિયાન વિદ્યાર્થીઓ તરફથી વરિષ્ઠ વકીલ વૃંદા ગ્રોવરે દલીલ કરી હતી કે જે વિદ્યાર્થીઓનો કોઈ ગુનાહિત ઇતિહાસ નથી, તેમની સામે નોંધાયેલી એફઆઈઆર પરત ખેંચવામાં આવે. તેમણે જણાવ્યું હતું કે પટનામાં નોંધાયેલી એક એફઆઈઆરમાં 5,000 અજાણ્યા પ્રદર્શનકારીઓનો ઉલ્લેખ કરવામાં આવ્યો છે, જેના કારણે નિર્દોષ વિદ્યાર્થીઓમાં ભયનો માહોલ છે.
સોલિસિટર જનરલ તુષાર મહેતાએ કોર્ટને જણાવ્યું કે સરકાર પોતાના આશ્વાસન અંગે ગંભીર છે અને પ્રદર્શનકારી વિદ્યાર્થીઓના કેસોની સમીક્ષા કરવામાં આવશે. તેમણે કહ્યું કે કેટલાક લોકો આ મુદ્દાને સતત ગરમ રાખવા માંગે છે. આ દરમિયાન મુખ્ય ન્યાયાધીશે દિલ્હી સહિત વિવિધ રાજ્યોમાં નોંધાયેલી તમામ એફઆઈઆરની વિગત કોર્ટ સમક્ષ રજૂ કરવાનો નિર્દેશ આપ્યો હતો.
બીજી તરફ, જંતર-મંતર પરના પ્રદર્શન દરમિયાન ઘાયલ થયેલા પોલીસકર્મીઓના પરિવારજનોએ પણ સુપ્રીમ કોર્ટમાં અરજી કરીને હુમલાખોરો સામે કડક કાર્યવાહી કરવાની માંગ કરી છે. કોર્ટે સ્પષ્ટ સંકેત આપ્યો કે જે લોકોનો કોઈ ગુનાહિત ઇતિહાસ નથી તેમને રાહત મળી શકે છે, પરંતુ હિંસા અને કાયદો-વ્યવસ્થામાં ખલેલ પહોંચાડનારા દોષિતો સામે કડક કાર્યવાહી કરવામાં કોઈ બાંધછોડ કરવામાં આવશે નહીં.
Reporter: admin
