અયોધ્યા: રામ મંદિરમાં શ્રદ્ધાળુઓ દ્વારા ચઢાવવામાં આવેલા દાન અને રોકડના કથિત ગબન મામલે પોલીસે મોટી કાર્યવાહી કરતાં એફઆઈઆરમાં નામજદ તમામ આઠ આરોપીઓની ધરપકડ કરી છે. એસઆઈટી (SIT) દ્વારા પ્રાથમિક તપાસનો અહેવાલ સરકારને સોંપ્યા બાદ આ કાર્યવાહી કરવામાં આવી હતી. આ મામલે આરોપોના ઘેરામાં આવેલા શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાય અને ટ્રસ્ટના સભ્ય અનિલ મિશ્રાએ પણ પોતાના પદ પરથી રાજીનામાં આપી દીધાં છે.
ઉત્તર પ્રદેશના મુખ્યમંત્રી યોગી આદિત્યનાથે દેવરિયામાં યોજાયેલી જાહેરસભામાં જણાવ્યું હતું કે એસઆઈટીના અહેવાલના આધારે કાર્યવાહી શરૂ કરી દેવામાં આવી છે અને સરકાર આ સમગ્ર મામલે "દૂધનું દૂધ અને પાણીનું પાણી" કરશે. તેમણે કહ્યું કે કોઈ પણ દોષિતને કોઈપણ સંજોગોમાં છોડવામાં નહીં આવે.
એસઆઈટીએ 23 જૂને પોતાનો પ્રાથમિક અહેવાલ રાજ્યના વધારાના મુખ્ય સચિવ (ગૃહ)ને સોંપ્યો હતો. એસઆઈટીના સભ્ય વિજય વિશ્વાસ પંતે જણાવ્યું હતું કે અહેવાલ સરકારને સુપરત કરી દેવામાં આવ્યો છે, પરંતુ તપાસ ચાલુ હોવાથી તેની વિગતો હાલ ગોપનીય રાખવામાં આવી છે.
ધરપકડ કરાયેલા આરોપીઓમાં અવિનાશ શુક્લા, અનુકલ્પ મિશ્રા, લવકુશ મિશ્રા, મનીષ કુમાર યાદવ, કરુણેશ પાંડે, રમાશંકર મિશ્રા, સુભાષ શ્રીવાસ્તવ અને રામશંકર યાદવ ઉર્ફે ટિન્નુનો સમાવેશ થાય છે. પોલીસના જણાવ્યા મુજબ તમામ આરોપીઓ મંદિરને દાનમાં મળતી રોકડ અને કિંમતી વસ્તુઓની ગણતરી તથા તેના સંચાલનની પ્રક્રિયા સાથે સંકળાયેલા હતા. તમામની અયોધ્યામાંથી ધરપકડ કરવામાં આવી છે અને તેમની પૂછપરછ ચાલી રહી છે.
પોલીસે આરોપીઓ સામે ભારતીય ન્યાય સંહિતા (BNS)ની કલમ 306 (સંપત્તિની ચોરી), 316 (ફોજદારી વિશ્વાસઘાત), 317 (ચોરીની સંપત્તિનો અપ્રમાણિક રીતે સ્વીકાર) અને 61 (ફોજદારી ષડયંત્ર) સહિતની વિવિધ કલમો હેઠળ ગુનો નોંધ્યો છે.
બીજી તરફ, વિપક્ષી પક્ષોએ આ કાર્યવાહીને માત્ર "દેખાડો" ગણાવી છે અને આરોપ લગાવ્યો છે કે ટ્રસ્ટના વરિષ્ઠ હોદ્દેદારોની જવાબદારી હજુ સુધી નક્કી કરવામાં આવી નથી. પોલીસે જણાવ્યું છે કે સમગ્ર મામલે તપાસ ચાલુ છે અને તપાસના આધારે આગળની કાર્યવાહી કરવામાં આવશે.
Reporter: admin
