ભારતના વડાપ્રધાન નરેન્દ્ર મોદી બુધવારે ઇન્ડોનેશિયાના યોગ્યાકાર્તા સ્થિત દેશના સૌથી મોટા હિંદુ મંદિર પ્રમ્બાનનની મુલાકાતે પહોંચ્યા હતા. ઇન્ડોનેશિયાના રાષ્ટ્રપતિ પ્રબોવો સુબિયાન્તો પણ તેમની સાથે હાજર રહ્યા હતા. બંને નેતાઓએ પ્રમ્બાનન મંદિરના સંરક્ષણ અને જીર્ણોદ્ધાર પ્રોજેક્ટનું લોકાર્પણ કર્યું તેમજ મંદિર ખાતે દર્શન કર્યા.
મંદિર પરિસરમાં આયોજિત કાર્યક્રમને સંબોધતા વડાપ્રધાન મોદીએ જણાવ્યું કે તેમને જીવનમાં હંમેશા કોઈને કોઈ સ્વરૂપે ભગવાન શિવ સાથે જોડાવાનો અવસર મળ્યો છે. તેમણે કહ્યું કે સોમનાથ, કાશી વિશ્વનાથ, કેદારનાથ ધામ અને ઉજ્જૈનના મહાકાલ મંદિર બાદ હવે પ્રમ્બાનન મંદિરના વિકાસમાં યોગદાન આપવાનો મોકો મળવો પોતાનું સૌભાગ્ય છે.
ઇન્ડોનેશિયાની મુલાકાત પૂર્ણ કર્યા બાદ વડાપ્રધાન મોદી ઓસ્ટ્રેલિયાના મેલબર્ન માટે રવાના થયા છે. તેઓ 8થી 10 જુલાઈ દરમિયાન ઓસ્ટ્રેલિયાના સત્તાવાર પ્રવાસે રહેશે.
યોગ્યાકાર્તા નજીક જાવા દ્વીપ પર આવેલું પ્રમ્બાનન મંદિર લગભગ એક હજાર વર્ષ જૂનું છે અને દક્ષિણ-પૂર્વ એશિયાનું બીજું સૌથી મોટું હિંદુ મંદિર માનવામાં આવે છે. મંદિર પરિસરમાં ત્રિમૂર્તિ ભગવાન શિવ, ભગવાન વિષ્ણુ અને ભગવાન બ્રહ્માને સમર્પિત મુખ્ય મંદિરો આવેલા છે. 47 મીટર ઊંચું શિવ મંદિર અહીંનું સૌથી વિશાળ આકર્ષણ છે. મંદિરની દિવાલો પર રામાયણ સહિતના હિંદુ ગ્રંથોના પ્રસંગો અંકિત કરવામાં આવ્યા છે.
Reporter:
