ભારતમાં ડિજિટલ પેમેન્ટને વધુ સરળ અને સર્વસુલભ બનાવવા માટે નેશનલ પેમેન્ટ્સ કોર્પોરેશન ઓફ ઇન્ડિયા (NPCI) નવી ઓફલાઇન UPI પેમેન્ટ સુવિધા પર કામ કરી રહ્યું છે. આ નવી સુવિધા અમલમાં આવ્યા બાદ યુઝર્સ ઇન્ટરનેટ કનેક્શન વગર પણ UPI દ્વારા સરળતાથી ચુકવણી કરી શકશે.
અહેવાલો અનુસાર, NPCI એવી ટેક્નોલોજી વિકસાવી રહ્યું છે, જેના માધ્યમથી અન્ય ડિવાઇસ અથવા વેપારીના પોઇન્ટ-ઓફ-સેલ (PoS) ટર્મિનલ પર ઇન્ટરનેટ વિના પણ UPI પેમેન્ટ શક્ય બનશે. આ સિસ્ટમ નિયર ફિલ્ડ કમ્યુનિકેશન (NFC) ટેક્નોલોજી પર આધારિત હશે, જે ખૂબ જ ઓછી દૂરીએ ઝડપી અને સુરક્ષિત રીતે ડેટા ટ્રાન્સફર કરવાની ક્ષમતા ધરાવે છે.
આ નવી ઓફલાઇન પેમેન્ટ સુવિધા હેઠળ એક ટ્રાન્ઝેક્શનની મહત્તમ મર્યાદા રૂ. 2,000 સુધી હોઈ શકે છે. જોકે આ સેવાનો ઉપયોગ કરવા માટે યુઝર્સે અગાઉથી ઇન્ટરનેટ મારફતે UPI Lite ડિજિટલ વૉલેટમાં રકમ ઉમેરવી પડશે. ત્યારબાદ જ્યાં ઇન્ટરનેટ સેવા ઉપલબ્ધ નહીં હોય ત્યાં NFC સપોર્ટ ધરાવતા PoS ટર્મિનલ પર માત્ર મોબાઇલ ડિવાઇસ ટૅપ કરીને સરળતાથી પેમેન્ટ કરી શકાશે. આ પ્રક્રિયામાં UPI PIN દાખલ કરવાની પણ જરૂર રહેશે નહીં.
અહેવાલમાં વધુમાં જણાવાયું છે કે NPCI આ વર્ષથી દેશમાં PoS ડિવાઇસ ઉત્પાદક કંપનીઓને નવા ઓફલાઇન UPI સિસ્ટમ માટે પ્રમાણિત કરવાની પ્રક્રિયા શરૂ કરી શકે છે, જેથી તેઓ આ ટેક્નોલોજીને સપોર્ટ કરી શકે.
જોકે હાલમાં પણ ઇન્ટરનેટ વિના UPI પેમેન્ટ માટે *99# અને UPI 123Pay જેવી સેવાઓ ઉપલબ્ધ છે. *99# સેવા USSD ટેક્નોલોજી પર કાર્ય કરે છે અને સામાન્ય GSM મોબાઇલ ફોનમાં પણ ઉપયોગ કરી શકાય છે. જ્યારે UPI 123Pay ખાસ કરીને ફીચર ફોન વપરાશકર્તાઓ માટે વિકસાવવામાં આવી છે. જોકે NFC આધારિત નવી સુવિધા અમલમાં આવ્યા બાદ ઓફલાઇન ડિજિટલ પેમેન્ટ વધુ ઝડપી, સરળ અને સુવિધાજનક બનવાની અપેક્ષા વ્યક્ત કરવામાં આવી રહી છે.
Reporter: admin
