મુંબઈ: મહારાષ્ટ્રના મુંબઈ, પુણે અને આસપાસના મુંબઈ મેટ્રોપોલિટન વિસ્તારમાં સતત વરસી રહેલા ભારે વરસાદ અને ભૂસ્ખલનને કારણે જનજીવન અસ્તવ્યસ્ત બની ગયું છે. ભારતીય હવામાન વિભાગની ભારે વરસાદની આગાહીને ધ્યાનમાં રાખીને મુંબઈ યુનિવર્સિટીએ આજે (6 જુલાઈ) યોજાનારી તમામ પરીક્ષાઓ રદ કરી છે. યુનિવર્સિટીએ જણાવ્યું છે કે નવી પરીક્ષા તારીખ ટૂંક સમયમાં જાહેર કરવામાં આવશે. આજે એલએલએમ, એમએસસી અને એમ.કોમની પરીક્ષાઓ યોજાવાની હતી.

બીજી તરફ, સતત વરસાદ અને ભૂસ્ખલનને કારણે મુંબઈ-પુણે વચ્ચેનો માર્ગ વ્યવહાર પણ ગંભીર રીતે પ્રભાવિત થયો છે. પુણે-મુંબઈ એક્સપ્રેસ-વે તેમજ જૂના મુંબઈ-પુણે હાઇવે પર અનેક સ્થળોએ ભૂસ્ખલનની ઘટના બનતા બંને માર્ગો પર વાહનવ્યવહાર આગામી સૂચના સુધી સંપૂર્ણપણે સ્થગિત કરવામાં આવ્યો છે. પુણેથી મુંબઈ અને મુંબઈથી પુણે જતાં તમામ વાહનોને રોકી દેવામાં આવ્યા છે.

પ્રશાસને નાગરિકોને અનિવાર્ય કારણ સિવાય મુંબઈ અને પુણે વચ્ચે મુસાફરી ન કરવાની અપીલ કરી છે. બચાવ અને રાહત કામગીરી માટે સંબંધિત વિભાગોની ટીમો તૈનાત કરવામાં આવી છે, જ્યારે અસરગ્રસ્ત વિસ્તારોની સ્થિતિ પર સતત નજર રાખવામાં આવી રહી છે. હવામાન વિભાગે આગામી કલાકોમાં પણ ભારે વરસાદની શક્યતા વ્યક્ત કરતાં લોકોને સતર્ક રહેવા સૂચના આપી છે.

Reporter: admin