ભારતના વિદેશ મંત્રી ડૉ. એસ. જયશંકરે મંગોલિયાની રાજધાની ઉલાનબાતારમાં મંગોલિયાના વિદેશ મંત્રી બટસેત્સેગ બટમુંખ સાથે મહત્વપૂર્ણ બેઠક કરી હતી. બેઠક દરમિયાન ભારત-મંગોલિયા વ્યૂહાત્મક ભાગીદારીના વિવિધ પાસાઓની સમીક્ષા કરવામાં આવી હતી. ડૉ. જયશંકરે સોશિયલ મીડિયા પોસ્ટમાં જણાવ્યું હતું કે ચર્ચાઓએ બંને દેશો વચ્ચેના સંબંધોની ઉષ્મા, મજબૂતી અને ભવિષ્યની સંભાવનાઓને પ્રતિબિંબિત કરી છે.

બેઠકમાં બંને દેશો વચ્ચે ચાલી રહેલા વિકાસ પ્રોજેક્ટ્સ, ક્ષમતા નિર્માણ, સંસ્કૃતિ, શિક્ષણ, સુરક્ષા અને બહુપક્ષીય મંચો પરના સહકાર અંગે વિગતવાર ચર્ચા થઈ હતી. આ ઉપરાંત, ખનન, સ્વચ્છ ઊર્જા અને એગ્રો-પ્રોસેસિંગ જેવા ક્ષેત્રોમાં સહકાર વધારવાની તકો પર પણ બંને પક્ષોએ વિચારવિમર્શ કર્યો હતો. ભારત અને મંગોલિયા વચ્ચેના દ્વિપક્ષીય સંબંધોને વધુ મજબૂત બનાવવા માટે આ મુલાકાતને મહત્વપૂર્ણ માનવામાં આવી રહી છે.

મંગોલિયા પ્રવાસના બીજા તબક્કામાં ડૉ. જયશંકર હવે દક્ષિણ કોરિયાની મુલાકાત લેશે. ત્યાં તેઓ દક્ષિણ કોરિયાના વિદેશ મંત્રી ચો હ્યુન સાથે દ્વિપક્ષીય ચર્ચા કરશે. ઉપરાંત, તેઓ ગુરુવારે જેજુ ખાતે યોજાનારા ‘જેજુ ફોરમ ફોર પીસ એન્ડ પ્રોસ્પેરિટી’માં મુખ્ય પ્રવચન આપશે. આ મુલાકાત દ્વારા ભારતના એશિયાઈ દેશો સાથેના રાજદ્વારી અને વ્યૂહાત્મક સંબંધોને વધુ વેગ મળશે.

Reporter: admin