ઉઝબેકિસ્તાનના વિદેશમંત્રી સઈદોવ બખ્તિયાર ઓદિલોવિચે જણાવ્યું કે તેમની ચાર દિવસીય ભારત મુલાકાતનો મુખ્ય હેતુ વડાપ્રધાન નરેન્દ્ર મોદીની પ્રસ્તાવિત ઉઝબેકિસ્તાન મુલાકાતની તૈયારીઓને અંતિમ સ્વરૂપ આપવાનો છે. તેમણે જણાવ્યું કે ભારત અને ઉઝબેકિસ્તાન વચ્ચેની વ્યૂહાત્મક ભાગીદારીને વધુ મજબૂત બનાવવા માટે બંને દેશો વચ્ચે સતત સંવાદ ચાલી રહ્યો છે.
સોમવારે ભારતના વિદેશમંત્રી ડૉ. એસ. જયશંકર સાથે પ્રતિનિધિમંડળ સ્તરની બેઠક બાદ સઈદોવે જણાવ્યું કે થોડા દિવસો પહેલાં બંને દેશોના નેતાઓ વચ્ચે થયેલી ટેલિફોનિક વાતચીત દરમિયાન પણ વડાપ્રધાન મોદીની મુલાકાતની તૈયારીઓ અંગે ચર્ચા થઈ હતી. તેમણે કહ્યું કે ભારતીય નેતૃત્વ સાથેની તેમની બેઠકઓ આ પ્રક્રિયાનો મહત્વપૂર્ણ ભાગ છે.
સઈદોવે ભારતને ઉઝબેકિસ્તાનનો વિશ્વસનીય અને મહત્વપૂર્ણ વ્યૂહાત્મક ભાગીદાર ગણાવતા જણાવ્યું કે દક્ષિણ એશિયામાં ભારત તેમનો સૌથી મહત્વનો સહયોગી દેશ છે. તેમણે ઉમેર્યું કે તેમના સમગ્ર પ્રતિનિધિમંડળને વડાપ્રધાન મોદીની મુલાકાતની તૈયારીઓને આગળ વધારવા માટે વિશેષ સૂચનાઓ આપવામાં આવી હતી.
ઉઝબેકિસ્તાનના વિદેશમંત્રી 2થી 5 ઓગસ્ટ દરમિયાન ભારતની સત્તાવાર મુલાકાતે છે. આ દરમિયાન તેમણે રાષ્ટ્રપતિ દ્રૌપદી મુર્મુ સાથે સૌજન્ય મુલાકાત કરી હતી અને ત્યારબાદ વિદેશમંત્રી ડૉ. એસ. જયશંકર સાથે દ્વિપક્ષીય સંબંધો અંગે વિસ્તૃત ચર્ચા કરી હતી.
બંને દેશોના વિદેશમંત્રીઓએ ઊર્જા, માળખાકીય સુવિધાઓ, વેપાર, સંરક્ષણ, શિક્ષણ અને સંસ્કૃતિ સહિતના વિવિધ ક્ષેત્રોમાં ચાલી રહેલા સહયોગની સમીક્ષા કરી હતી. ઉપરાંત પ્રાદેશિક અને વૈશ્વિક પડકારો અંગે પણ ચર્ચા કરવામાં આવી અને બહુપક્ષીય મંચો પર સહકાર વધુ મજબૂત બનાવવાની પ્રતિબદ્ધતા વ્યક્ત કરવામાં આવી.
વિદેશમંત્રી ડૉ. એસ. જયશંકરે સોશિયલ મીડિયા પ્લેટફોર્મ 'એક્સ' પર પોસ્ટ કરીને જણાવ્યું કે ઉઝબેકિસ્તાનના તેમના સમકક્ષ સાથેની બેઠકમાં બંને દેશો વચ્ચેની વ્યૂહાત્મક ભાગીદારીને વધુ મજબૂત બનાવવા તેમજ વિવિધ ક્ષેત્રોમાં સહયોગ વધારવા અંગે સકારાત્મક અને રચનાત્મક ચર્ચા થઈ હતી.
Reporter: admin
