ભારતમાં ઝડપથી વધી રહેલા ડિજિટલ ઈન્ફ્રાસ્ટ્રક્ચર વચ્ચે ડેટા સેન્ટર ક્ષેત્ર રોજગાર અને રિયલ એસ્ટેટ વિકાસ માટે નવી તકો ઉભી કરી રહ્યું છે. સ્ક્વેર યાર્ડ્સના એક રિપોર્ટ અનુસાર, દેશમાં પ્રસ્તાવિત આશરે 9,030 મેગાવોટ ક્ષમતાવાળા ડેટા સેન્ટર પ્રોજેક્ટ્સ વર્ષ 2030 સુધીમાં લગભગ 4.33 લાખ સીધી અને પરોક્ષ નોકરીઓનું સર્જન કરી શકે છે. આ સાથે આ પ્રોજેક્ટ્સના કારણે લગભગ 19.5 કરોડ વર્ગફૂટ વધારાની રહેણાંક માંગ ઉભી થવાનો અંદાજ છે.
રિપોર્ટ મુજબ, ભારત વિશ્વના કુલ ડિજિટલ ડેટાનો લગભગ 20 ટકા હિસ્સો તૈયાર કરે છે, પરંતુ વૈશ્વિક ડેટા સેન્ટર ક્ષમતામાં ભારતની ભાગીદારી હજુ માત્ર 4 ટકા છે. આર્ટિફિશિયલ ઈન્ટેલિજન્સ (AI), ક્લાઉડ કમ્પ્યુટિંગ અને ડિજિટલ સેવાઓના વધતા ઉપયોગને કારણે ડેટા સેન્ટર ક્ષેત્રમાં રોકાણ ઝડપથી વધી રહ્યું છે.
નિષ્ણાતોના જણાવ્યા અનુસાર, ડેટા સેન્ટર માત્ર ડિજિટલ સેવાઓ પૂરતા મર્યાદિત નથી રહેતા, પરંતુ તેની આસપાસ વીજળી નેટવર્ક, ફાઇબર કનેક્ટિવિટી, લોજિસ્ટિક્સ અને વ્યાવસાયિક પ્રવૃત્તિઓનો પણ વિકાસ થાય છે. રિપોર્ટમાં ડેટા સેન્ટર પરિસરની આસપાસના 5થી 15 કિલોમીટરના વિસ્તારને "ગોલ્ડન રિંગ" તરીકે ઓળખાવવામાં આવ્યો છે, જ્યાં આગામી વર્ષોમાં રહેણાંક ટાઉનશિપ, રિટેલ માર્કેટ અને અન્ય શહેરી સુવિધાઓનો ઝડપી વિકાસ થવાની શક્યતા છે.
રાજ્યોની વાત કરીએ તો મહારાષ્ટ્રને સૌથી વધુ લાભ મળવાની સંભાવના છે, જ્યાં 5.4 કરોડ વર્ગફૂટથી વધુ રહેણાંક માંગ ઊભી થઈ શકે છે. આ ઉપરાંત કર્ણાટક, આંધ્રપ્રદેશ, ઉત્તર પ્રદેશ, તેલંગાણા અને તમિલનાડુમાં પણ ડેટા સેન્ટર રોકાણથી રોજગાર અને રિયલ એસ્ટેટ ક્ષેત્રને મોટો વેગ મળવાની શક્યતા વ્યક્ત કરવામાં આવી છે.
Reporter: admin
