વડોદરા ના હરિનગર ઇસ્કોન મંદિર વિસ્તારમાં તસ્કરો બેફામ બનતા સ્થાનિકોએ જાતે જ રક્ષણ માટે વોચ ગોઠવવાનું શરૂ કર્યું. જે દરમિયાન વાહન ચોરીની આશંકાએ સ્થાનિકોએ એક શંકાસ્પદ યુવકને ઝડપી ઢીબી નાખ્યો. ઈજાગ્રસ્ત યુવકને ઢોર માર માર્યા બાદ અકોટા પોલીસને સોંપવામાં આવ્યો.
શહેરના હરિનગર ઇસ્કોન મંદિર વિસ્તારમાં છેલ્લા ઘણાય સમયથી તસ્કરોનો તરખાટ જોવા મળી રહ્યો છે. નારાયનપુરા તેમજ બીવી નગરમાં એક અઠવાડિયા અગાઉ ચોરી થઈ હતી. વિસ્તારમાં તસ્કરો બેફામ બનતા લોકો પરેશાન થઇ ગયા હતા. જેથી આખરે વિસ્તારમાં તસ્કરોનો ત્રાસ વધતા સ્થાનિકોએ જાતે જ વોચ ગોઠવવાનું શરુ કર્યું. જે અંતર્ગત ગઈકાલે વ્હીકલ ચોરી કરવા આવ્યા હોવાની આશંકાના પગલે એક યુવકને સ્થાનિકોએ ઝડપી પાડ્યો હતો.
જેના બાદમાં રોષે ભરાયેલા ટોળાએ કાયદો હાથમાં લીધો હતો. જેમાં ટોળાએ ચોરીની આશંકાએ શંકાસ્પદ યુવકના હાથ બાંધી બંદી બનાવ્યો અને ત્યારબાદ ઢોર માર માર્યો હતો. જોકે, આ સમગ્ર ઘટનાના વિડિયો પણ સામે આવ્યા છે. સ્થાનિકોએ યુવકને ઢોર માર મારતા યુવક ઈજાગ્રસ્ત થયો હતો. જેના બાદમાં ઈજાગ્રસ્ત યુવકને સ્થાનિકો દ્વારા અકોટા પોલીસને સોંપવામાં આવ્યો.
Reporter: News Plus
